ടൂറിസ്റ്റുകളുടെ എണ്ണത്തിൽ ഖത്തർ പുതിയ റെക്കോർഡിലേക്ക്, ഒക്ടോബർ വരെയെത്തിയത് നാൽപതു ലക്ഷത്തിലധികം സന്ദർശകർ
2024 ഒക്ടോബർ അവസാനത്തോടെ രാജ്യത്തെത്തിയ സന്ദർശകരുടെ എണ്ണം 4 ദശലക്ഷത്തിൽ എത്തിയതായി ഖത്തർ ടൂറിസം അറിയിച്ചു, ഇത് 2023-ലെ മൊത്തം സന്ദർശകരുടെ എണ്ണത്തിന് തുല്യമാണ്. കഴിഞ്ഞ വർഷത്തെ അപേക്ഷിച്ച് ഈ വർഷം ഇതുവരെ, അന്താരാഷ്ട്ര സന്ദർശകരുടെ എണ്ണത്തിൽ 26% വർധനവുണ്ടായി.
ശൈത്യകാലം ആരംഭിക്കുകയും നിരവധി പ്രവർത്തനങ്ങൾ ആസൂത്രണം ചെയ്യുകയും ചെയ്യുന്നതിനാൽ 2024 അവസാനത്തോടെ സന്ദർശകരുടെ എണ്ണം പുതിയ റെക്കോർഡിൽ എത്തുമെന്ന് ഈ കണക്കുകൾ സൂചിപ്പിക്കുന്നു.
GCC (ഗൾഫ് സഹകരണ കൗൺസിൽ) രാജ്യങ്ങളിൽ നിന്നുള്ള സന്ദർശകർ 41.8% വരും, ബാക്കി 58.2% മറ്റുള്ള രാജ്യങ്ങളിൽ നിന്നുള്ളവരാണ്. സൗദി അറേബ്യ, ഇന്ത്യ, യുണൈറ്റഡ് കിങ്‌ഡം, ബഹ്റൈൻ, യുണൈറ്റഡ് സ്റ്റേറ്റ്സ്, കുവൈറ്റ്, ഒമാൻ, ജർമ്മനി, യുണൈറ്റഡ് അറബ് എമിറേറ്റ്സ്, ചൈന എന്നിവയാണ് ഖത്തറിലേക്ക് ഏറ്റവും കൂടുതൽ സന്ദർശകരെത്തിയ ആദ്യത്തെ 10 രാജ്യങ്ങൾ.
സന്ദർശകരിൽ 56.2% വിമാനമാർഗവും 37.84% കരമാർഗവും 5.96% കടൽ മാർഗവും എത്തി. ഖത്തറിൻ്റെ ഹോസ്‌പിറ്റാലിറ്റി വ്യവസായവും ഇതിന്റെ ഭാഗമായി വളർന്നിട്ടുണ്ട്.
