ലണ്ടൻ: അടുത്ത അഞ്ച് മുതൽ പത്ത് വർഷത്തിനുള്ളിൽ ഖത്തർ എനർജി ലോകത്തിലെ ഏറ്റവും വലിയ ദ്രവീകൃത പ്രകൃതി വാതക (എൽഎൻജി) വ്യാപാരിയാകുമെന്ന് കമ്പനി സിഇഒയും ഖത്തറിന്റെ ഊർജകാര്യ സഹമന്ത്രിയുമായ സാദ് അൽ കാബി ബുധനാഴ്ച പറഞ്ഞു. ഇന്നലെ ലണ്ടനിൽ നടന്ന എനർജി ഇന്റലിജൻസ് ഫോറത്തിൽ സംസാരിക്കുകയായിരുന്നു അദ്ദേഹം.
നിലവിൽ, ലോകത്തിലെ ഏറ്റവും വലിയ എൽഎൻജി കമ്പനി സൂപ്പർമേജർ ഷെല്ലും തൊട്ടുപിന്നാലെ ടോട്ടൽ എനർജീസുമാണ്. “ഞങ്ങൾ ഇപ്പോൾ ഏകദേശം 5-10 ദശലക്ഷം (ടൺ എൽഎൻജി) വ്യാപാരം നടത്തുന്നു. അടുത്ത 5-10 വർഷത്തിനുള്ളിൽ ഞങ്ങൾ ലോകത്തിലെ ഏറ്റവും വലിയ എൽഎൻജി വ്യാപാരിയാകും,” അദ്ദേഹം പറഞ്ഞു.
ഏകദേശം രണ്ട് വർഷം മുമ്പ് എൽഎൻജി വ്യാപാരം ആരംഭിച്ച ഖത്തർ എനർജി ഇതിനകം തന്നെ വൻ ലാഭമാണ് ഉണ്ടാക്കിയത്. “സംരംഭത്തിന്റെ ലാഭം ഞാൻ വിചാരിച്ചതിന്റെ 20 മടങ്ങ് ആണെന്ന് ഞാൻ പറയും,” അൽ-കാബി പറഞ്ഞു.
ലോകത്തിലെ ഏറ്റവും വലിയ എൽഎൻജി പദ്ധതി ഖത്തർ കഴിഞ്ഞ വർഷം പ്രഖ്യാപിച്ചിരുന്നു. അതിന്റെ എൽഎൻജി ഉൽപ്പാദന ശേഷി പ്രതിവർഷം 77 ദശലക്ഷം ടണ്ണിൽ നിന്ന് (എംഎംടിപിഎ) 110 എംഎംടിപിഎ ആയി ഉയർത്തുന്നതായിരുന്നു പദ്ധതി.
ഇറാനുമായി പങ്കിടുന്ന ലോകത്തിലെ ഏറ്റവും വലിയ പ്രകൃതി വാതക ഫീൽഡായ നോർത്ത് ഫീൽഡിൽ മറ്റൊരു വിപുലീകരണ ഘട്ടവും ഖത്തർ ആസൂത്രണം ചെയ്യുന്നുണ്ട്. രണ്ടാം വിപുലീകരണ ഘട്ടം നോർത്ത് ഫീൽഡ് സൗത്ത് പ്രോജക്റ്റ് (എൻഎഫ്എസ്) ആയിരിക്കും. ഖത്തറിന്റെ എൽഎൻജി ഉൽപ്പാദന ശേഷി 110 എംഎംടിപിഎയിൽ നിന്ന് 126 എംഎംടിപിഎ ആയി വർധിപ്പിക്കും. 2027ൽ ഉൽപ്പാദനം ആരംഭിക്കുമെന്ന് പ്രതീക്ഷിക്കുന്നു.
ഇന്ന് എനർജി ഇന്റലിജൻസ് ഫോറത്തിൽ സംസാരിച്ച അൽ-കാബി പ്രകൃതി വാതകം “ഒരു പരിവർത്തന ഇന്ധനമല്ല, ലക്ഷ്യസ്ഥാന ഇന്ധനമാണ് (not a transition fuel but a destination fuel)” എന്ന് പറഞ്ഞു. വൈദ്യുതിയിൽ, ബേസ് ലോഡ് ആയി ഉപയോഗിക്കുന്നത് ആണവവും വാതകവുമാണെന്ന് അദ്ദേഹം ചൂണ്ടിക്കാട്ടി.
അടുത്ത 20 മുതൽ 30 വർഷത്തിനുള്ളിൽ പ്രകൃതിവാതക ആവശ്യം ഉയർന്നേക്കുമെന്ന് തോന്നുന്നില്ലെന്നും അദ്ദേഹം വ്യക്തമാക്കി.
