ട്രാൻസ്പരൻസി ഇന്റർനാഷണലിന്റെ ഏറ്റവും പുതിയ കറപ്ഷൻ പെർസെപ്ഷൻസ് ഇൻഡക്സ് 2022 (സിപിഐ) പ്രകാരം, അറബ് ലോകത്ത് ഏറ്റവും കുറവ് അഴിമതിയുള്ള രണ്ടാമത്തെ രാജ്യമായി ഖത്തർ സ്ഥാനം നിലനിർത്തി. എന്നാൽ കഴിഞ്ഞ പത്ത് വർഷത്തിനിടയിലെ ഏറ്റവും കുറഞ്ഞ സ്‌കോറാണ് (100ൽ 58) ഖത്തറിന് ഇക്കുറി നേടാൻ ആയത്. 2015ൽ നേടിയ 71 ആണ് ഇത് വരെയുള്ളതിൽ രാജ്യത്തിന്റെ ഏറ്റവും ഉയർന്ന സ്‌കോർ.
നംബിയോ ക്രൈം ഇൻഡക്സ് പ്രകാരം ഖത്തർ അടുത്തിടെ ലോകത്തിലെ ‘സുരക്ഷിത രാജ്യം’ ആയി തിരഞ്ഞെടുക്കപ്പെട്ടിരുന്നു. ദോഹ ലോകത്തിലെ ഏറ്റവും സുരക്ഷിതമായ രണ്ടാമത്തെ നഗരവുമായി.
പൊതുമേഖലാ അഴിമതിയുടെ തലത്തിൽ 0/100 സ്കെയിലിൽ ആണ് അഴിമതി രേഖപ്പെടുത്തുക. 0 എന്നാൽ ഉയർന്ന അഴിമതിയും 100 എന്നാൽ വളരെ ശുദ്ധവും എന്നാണ് സ്കെയിലിംഗ്.
അതേസമയം, സി.പി.ഐ സ്‌കോർ 67 ഉള്ള യു.എ.ഇ.യാണ് അറബ് രാജ്യങ്ങളിൽ മുന്നിൽ. യുദ്ധത്തിൽ തകർന്ന രാജ്യങ്ങളായ ലിബിയ (17), യെമൻ (16), സിറിയ (13) എന്നിവയാണ് സി.പി.ഐ.യെ സംബന്ധിച്ചിടത്തോളം ഏറ്റവും അഴിമതിയുള്ള അറബ് രാജ്യങ്ങൾ.
ഗൾഫ് മേഖലയിൽ, കുവൈത്ത് ആണ് റാങ്കിംഗിൽ ഏറ്റവും പിന്നിൽ (42). സൗദി അറേബ്യ 51, ബഹ്‌റൈൻ, ഒമാൻ എന്നിവ 44 വീതവും നേടി.
അറബ് മേഖലയിലുടനീളമുള്ള പല രാജ്യങ്ങളിലും, സംസ്ഥാന സുരക്ഷാ ബജറ്റുകളിൽ സുതാര്യതയില്ലാത്തതിനാൽ പൊതുജനങ്ങളുടെ ഇൻപുട്ടില്ലാതെ ഫണ്ട് ചെലവഴിക്കാനും സത്യസന്ധമല്ലാതെ പണം വഴിതിരിച്ചുവിടാനും അനുവദിക്കുന്നുവെന്ന് റിപ്പോർട്ട് പ്രസ്താവിച്ചു.
ഈ വർഷം സൂചികയിൽ 90 പോയിന്റുമായി ഡെന്മാർക്ക് ഒന്നാം സ്ഥാനത്തും 87 പോയിന്റ് വീതമുള്ള ഫിൻലൻഡും ന്യൂസിലൻഡും തൊട്ടുപിന്നിലുമെത്തി. സംഘർഷ ബാധിത രാജ്യങ്ങളായ സൊമാലിയയും ദക്ഷിണ സുഡാനും സിറിയയും യഥാക്രമം 12, 13, 13 പോയിന്റുമായി സൂചികയുടെ ഏറ്റവും താഴെയെത്തി.
🇶🇦 ഖത്തറിലെ വാർത്തകളും വിവരങ്ങളും തത്സമയം ലഭിക്കാൻ -വാട്ട്സ്ആപ്പ് ഗ്രൂപ്പ്👇https://chat.whatsapp.com/ETZibLnOU6HDxQYluvP8Yi
