കുട്ടികളിൽ ഫ്ലൂ നിരവധി സങ്കീർണതകളുണ്ടാക്കും, വാക്സിൻ എടുക്കേണ്ടതിന്റെ പ്രാധാന്യം വീണ്ടുമോർപ്പിച്ച് പിഎച്ച്സിസി
പ്രൈമറി ഹെൽത്ത് കെയർ കോർപ്പറേഷൻ (പിഎച്ച്സിസി) ഫ്ലൂ വാക്‌സിൻ്റെ പ്രാധാന്യം വീണ്ടും വ്യക്തമാക്കി. ആറ് മാസവും അതിൽ കൂടുതലുമുള്ള കുട്ടികൾക്ക് വാക്സിൻ എടുക്കേണ്ടത് വളരെ പ്രധാനമാണെന്ന് അവർ വ്യക്തമാക്കുന്നു.
കുട്ടികൾക്ക് അസുഖങ്ങൾ വരാതിരിക്കാൻ ഫ്ലൂ വാക്സിൻ സഹായിക്കുമെന്ന് PHCC അഭിപ്രായപ്പെട്ടു. ഫ്ലൂ ഒരു വ്യക്തിയെ ഒരാഴ്‌ചയോ അതിൽ കൂടുതലോ സമയം രോഗിയാക്കുമെന്ന് അവർ പ്രസ്‌താവനയിൽ പറയുന്നു. അഞ്ച് വയസ്സിന് താഴെയുള്ള കുട്ടികൾക്ക്, പ്രത്യേകിച്ച് രണ്ട് വയസ്സിന് താഴെയുള്ളവർക്ക് പനി മൂലം ഗുരുതരമായ സങ്കീർണതകൾ ഉണ്ടാകാനുള്ള സാധ്യത കൂടുതലാണ്.
ഈ പ്രായത്തിലുള്ള കുട്ടികൾക്കിടയിൽ ഇൻഫ്ലുവൻസ മൂലം ന്യുമോണിയ, നിർജ്ജലീകരണം, ഹൃദ്രോഗം അല്ലെങ്കിൽ ആസ്ത്മ പോലുള്ള ദീർഘകാല മെഡിക്കൽ പ്രശ്‌നങ്ങൾ, എൻസെഫലോപ്പതി പോലുള്ള മസ്‌തിഷ്‌ക സംബന്ധമായ പ്രശ്‌നങ്ങൾ, സൈനസ് പ്രശ്‌നങ്ങളും ചെവി അണുബാധയും തുടങ്ങിയ സങ്കീർണതകൾ ഉണ്ടാക്കുമെന്നും ഇവ ചിലപ്പോൾ മരണത്തിനു വരെ കാരണമാകുമെന്നും പിഎച്ച്സിസി അറിയിച്ചു.
ഇൻഫ്ലുവൻസ വാക്സിൻ കുട്ടികളെ ഇൻഫ്ലുവൻസയിൽ നിന്നും അതിൻ്റെ ഗുരുതരമായ പ്രത്യാഘാതങ്ങളിൽ നിന്നും സംരക്ഷിക്കുക മാത്രമല്ല, അതിനൊപ്പം പ്രായമായവർ, ആസ്ത്മ പോലുള്ള ആരോഗ്യപ്രശ്നങ്ങൾ ഉള്ളവർ തുടങ്ങിയ ദുർബലരായ ആളുകളിലേക്ക് പനി പടരുന്നത് കുറയ്ക്കാനും സഹായിക്കുന്നു.
ആറ് മാസത്തിൽ താഴെയുള്ള കുട്ടികൾക്ക് വാക്സിൻ എടുക്കാൻ കഴിയില്ല. എന്നാൽ അവരുടെ മാതാപിതാക്കൾ, പരിചരണം നൽകുന്ന മറ്റുള്ളവർ, വീട്ടിലെ മുതിർന്ന കുട്ടികൾ എന്നിവർക്ക് ഇത് ലഭിച്ചാൽ, അത് കുഞ്ഞിനും ഗുണകരമാകും. ഇൻഫ്ലുവൻസയിൽ നിന്നുള്ള ഗുരുതരമായ പ്രശ്‌നങ്ങൾ ശിശുക്കളെ കൂടുതൽ ബാധിക്കാൻ സാധ്യതയുള്ളതിനാൽ ഇത് പ്രധാനമാണ്.
ആറ് മാസം മുതൽ എട്ട് വയസ്സ് വരെ പ്രായമുള്ള കുട്ടികൾക്ക് മുൻപ് ഫ്ലൂ വാക്സിൻ ലഭിച്ചിട്ടില്ലെങ്കിൽ ഈ സീസണിൽ രണ്ട് ഡോസ് വാക്സിൻ ആവശ്യമാണ്, അവർ കൂട്ടിച്ചേർത്തു.
