ഖത്തർ സർക്കാർ വിവേചനരഹിതമായ മിനിമം വേതനം ഏർപ്പെടുത്തിയതും നടപ്പാക്കിയതും തൊഴിലാളികളുടെയും അവരുടെ കുടുംബങ്ങളുടെയും ജീവിത നിലവാരം മെച്ചപ്പെടുത്താൻ സഹായിച്ചതായി ദേശീയ മനുഷ്യാവകാശ സമിതി (എൻഎച്ച്ആർസി) വൈസ് ചെയർമാൻ ഡോ. മുഹമ്മദ് ബിൻ സെയ്ഫ് അൽ കുവാരി പറഞ്ഞു.
2021 മാർച്ച് 20-ന്, ഖത്തറിന്റെ മിനിമം വേതന നിയമം (QR1,000) പ്രാബല്യത്തിൽ വന്നു. ഇത് ഗാർഹിക തൊഴിലാളികൾ ഉൾപ്പെടെ എല്ലാ മേഖലകളിലെയും എല്ലാ രാജ്യക്കാരുമായ തൊഴിലാളികൾക്ക് ബാധകമാണ്. താമസത്തിനായി പ്രതിമാസം QR500 ഉം ഭക്ഷണത്തിന് QR300 ഉം തൊഴിലുടമ അധികമായി നൽകണം.
“എൻഎച്ച്ആർസി വൈസ് ചെയർമാനെന്ന നിലയിൽ ലേബർ ക്യാമ്പുകൾ സന്ദർശിച്ച വേളയിൽ, ഖത്തറിലെ അവരുടെ അവസ്ഥയെക്കുറിച്ച് തൊഴിലാളികളിൽ നിന്ന് എനിക്ക് വളരെ നല്ല പ്രതികരണങ്ങൾ ലഭിച്ചു. ഖത്തറിൽ നിന്ന് സമ്പാദിച്ച പണം ഖത്തറിലും മാതൃരാജ്യത്തും തങ്ങളുടെ സാമൂഹിക നില മെച്ചപ്പെടുത്താൻ സഹായിച്ചതായി അവർ എന്നോട് പറഞ്ഞു,” ഖത്തർ റേഡിയോയോട് സംസാരിച്ച അൽ കുവാരി പറഞ്ഞു.
തങ്ങളുടെയും കുടുംബത്തിന്റെയും ജീവിതസാഹചര്യങ്ങൾ മെച്ചപ്പെടുത്തിയതായി തൊഴിലാളികൾ പറഞ്ഞതായി എൻഎച്ച്ആർസി വൈസ് ചെയർമാൻ പറഞ്ഞു. ഈ നടപടികൾ തൊഴിലാളികളിൽ മികച്ച സ്വാധീനം ചെലുത്തിയിട്ടുണ്ടെന്നും അദ്ദേഹം ചൂണ്ടിക്കാട്ടി.
തൊഴിലാളികൾക്ക് സന്തോഷകരമായ ജീവിതം നയിക്കാൻ അനുയോജ്യമായ താമസസൗകര്യം ഒരുക്കുന്നുണ്ടെന്ന് അൽ കുവാരി പറഞ്ഞു. ലേബർ അക്കോമഡേഷൻ കോംപ്ലക്സുകൾക്കുള്ളിൽ എല്ലാ സൗകര്യങ്ങളും ജീവിതാവശ്യങ്ങളും ഒരുക്കുന്നുണ്ടെന്ന് അദ്ദേഹം പറഞ്ഞു.
ഉദാഹരണത്തിന്, മെസൈമീറിലെ ലേബർ സിറ്റി, അന്താരാഷ്ട്ര നിലവാരമുള്ളതാണ്, 2 ദശലക്ഷത്തിലധികം ചതുരശ്ര മീറ്റർ വിസ്തൃതിയുള്ളതും 100,000 തൊഴിലാളികളെ ഉൾക്കൊള്ളുന്നതുമാണ്. ഹോസ്പിറ്റൽ, ക്ലിനിക്കുകൾ, ഷോപ്പിംഗ് കോംപ്ലക്സ്, ക്രിക്കറ്റ് സ്റ്റേഡിയം, സിനിമാ ഹാളുകൾ, റെസ്റ്റോറന്റുകൾ, മറ്റ് സൗകര്യങ്ങൾ തുടങ്ങിയവ ഹൗസിംഗ് യൂണിറ്റിൽ ഉൾപ്പെടുന്നു.
അതേസമയം, ഖത്തറിനെതിരായ മനുഷ്യാവകാശ ലംഘന ആരോപണത്തെ കുറിച്ച് സംസാരിച്ച അൽ കുവാരി, അടിസ്ഥാനരഹിതമായ കാരണങ്ങളാൽ നിക്ഷിപ്ത താൽപ്പര്യമുള്ള സ്ഥാപനങ്ങളും വ്യക്തികളുമാണ് ഇത്തരം പ്രചാരണങ്ങൾ നടത്തുന്നതെന്ന് പറഞ്ഞു.
തൊഴിലാളികളുടെ അവകാശങ്ങൾ സംരക്ഷിക്കുന്നതിനായി, ഒന്നോ രണ്ടോ ആഴ്ചകൾക്കുള്ളിൽ അവരുടെ കേസുകൾ അതിവേഗം പരിഹരിക്കുന്നതിന് തൊഴിൽ മന്ത്രാലയത്തിൽ ഒരു തൊഴിൽ തർക്ക പരിഹാര സമിതി രൂപീകരിച്ചു.
പ്രവാസി തൊഴിലാളികളുടെ അവകാശങ്ങളും കടമകളും വ്യക്തമാക്കിക്കൊണ്ട് മനുഷ്യാവകാശങ്ങളുടെ ആവശ്യകതകൾക്ക് അനുസൃതമായി ഖത്തർ നിയമങ്ങളും വികസിപ്പിച്ചെടുത്തിട്ടുണ്ട്.
ഖത്തർ അവതരിപ്പിച്ച നിയമങ്ങളിൽ സ്‌പോൺസർഷിപ്പ് സമ്പ്രദായം (കഫാല) നിർത്തലാക്കലും ഉൾപ്പെടുന്നു. ഇത് ആഗോള പ്രശംസ നേടിയ ഒരു നടപടിയാണ്. നിയമം ജീവനക്കാരെ അവരുടെ തൊഴിൽ കരാറുകളെ അടിസ്ഥാനമാക്കി പ്രവർത്തിക്കാൻ അനുവദിക്കുന്നു – ജോലി മാറ്റാനും ആവശ്യമുള്ളപ്പോഴെല്ലാം യാത്ര ചെയ്യാനും അവരെ പ്രാപ്തരാക്കുന്നു.
വേജ് പ്രൊട്ടക്ഷൻ സിസ്റ്റം (WPH) തൊഴിലാളികൾക്ക് അവരുടെ ശമ്പളം കാലതാമസമില്ലാതെ കൃത്യസമയത്ത് ലഭിക്കുന്നുണ്ടെന്ന് ഉറപ്പാക്കുന്നു. വേനലിൽ പകൽ സമയം പുറം ജോലി നിരോധിക്കുന്ന സമ്മർ വർക്കിംഗ് ഹവേഴ്‌സ് നിയമത്തെയും അദ്ദേഹം പ്രശംസിച്ചു.
🇶🇦 ഖത്തറിലെ വാർത്തകളും വിവരങ്ങളും തത്സമയം ലഭിക്കാൻ -വാട്ട്സ്ആപ്പ് ഗ്രൂപ്പിൽ ജോയിൻ ചെയ്യൂ👇 https://chat.whatsapp.com/GJ6QOQG9mLGFPu4HFaJnCe
