പുതിയ അധ്യയനവർഷത്തേക്കായി മികച്ച സുരക്ഷാ സംവിധാനങ്ങളോടെ 3,000 പരിസ്ഥിതി സൗഹൃദ സ്‌കൂൾ ബസുകൾ അവതരിപ്പിച്ച് മൊവാസലാത്ത്
പുതിയ 2024-25 അധ്യയന വർഷത്തേക്ക് ഏറ്റവും പുതിയ സുരക്ഷാ സംവിധാനങ്ങളോടെ 3,000 പരിസ്ഥിതി സൗഹൃദ സ്‌കൂൾ ബസുകൾ മൊവാസലാത്ത് (കർവ) അവതരിപ്പിച്ചതായി ഒരു ഉന്നത ഉദ്യോഗസ്ഥൻ പറഞ്ഞു.
കാർബൺ ബഹിർഗമനം കുറയ്ക്കുന്നതിന് യൂറോ 5 നിലവാരമുള്ള ഡീസൽ ബസുകളും പത്ത് ഇലക്ട്രിക് ബസുകളും തങ്ങളുടെ കൈവശം ഇപ്പോൾ ഉണ്ടെന്ന് മൊവാസലാത്തിലെ സ്ട്രാറ്റജി മാനേജ്‌മെൻ്റ് ഓഫീസ് ഡയറക്ടർ മുഹമ്മദ് അഹമ്മദ് എം കെ അബുഖാദിജ പറഞ്ഞു.
ദോഹ ഫെസ്റ്റിവൽ സിറ്റിയിൽ ഇന്നലെ നടന്ന ബാക്ക്-ടു-സ്‌കൂൾ കാമ്പയിൻ്റെ ഉദ്ഘാടന വേളയിൽ, വിദ്യാർത്ഥികളുടെ സുരക്ഷിത ഗതാഗതം ഉറപ്പാക്കുന്നതിന് ബസ് ഡ്രൈവർമാർക്കും സൂപ്പർവൈസർമാർക്കും പരിശീലനം ലഭിച്ചിട്ടുണ്ടെന്നും അബുഖാദിജ പറഞ്ഞു.
വിദ്യാഭ്യാസ-ഉന്നത വിദ്യാഭ്യാസ മന്ത്രാലയവുമായി സഹകരിച്ച് സംഘടിപ്പിക്കുന്ന ബാക്ക്-ടു-സ്‌കൂൾ കാമ്പെയ്ൻ ഇന്നലെ ആരംഭിച്ചത് ഓഗസ്റ്റ് 31 വരെ നീണ്ടുനിൽക്കും. “എൻ്റെ സ്‌കൂൾ എൻ്റെ രണ്ടാം വീടാണ്” എന്ന പ്രമേയത്തിലാണ് പുതിയ അധ്യയന വർഷത്തിലെ പ്രവർത്തനങ്ങൾക്കായി വിദ്യാർത്ഥികളെ സജ്ജമാക്കാൻ ലക്ഷ്യമിടുന്നത്.
ദോഹ ഫെസ്റ്റിവൽ സിറ്റിയിൽ എല്ലാ ദിവസവും ഉച്ചകഴിഞ്ഞ് 3 മുതൽ രാത്രി 9 വരെയാണ് പരിപാടി നടക്കുന്നത്. കുട്ടികൾക്കും വിദ്യാർത്ഥികൾക്കുമായി വിദ്യാഭ്യാസപരമായ ഗെയിമുകൾ, ശിൽപശാലകൾ തുടങ്ങി വിവിധ പ്രവർത്തനങ്ങൾ ഇതിൽ ഉൾപ്പെടുന്നു. ഈ പ്രവർത്തനങ്ങൾ വിദ്യാർത്ഥികളുടെ കഴിവുകൾ മെച്ചപ്പെടുത്തുന്നതിനും പോസിറ്റിവായ പരിതസ്ഥിതിയിൽ പഠിക്കുന്നതിനെക്കുറിച്ച് അവബോധം വളർത്തുന്നതിനും സഹായിക്കുന്നു.
