പ്രാദേശികമായി ഉത്പാദിപ്പിച്ച കൂടുതൽ പച്ചക്കറികൾ ഖത്തറിലെ റീട്ടെയിൽ മാർക്കറ്റുകളിലേക്കെത്തുന്നു
ഖത്തറിലെ റീട്ടെയിൽ മാർക്കറ്റുകളിലും സൂപ്പർമാർക്കറ്റുകളിലും അൽ സൈലിയ സെൻട്രൽ മാർക്കറ്റ് പോലുള്ള സ്ഥലങ്ങളിലും പ്രാദേശികമായി ഉത്പാദിപ്പിച്ച പച്ചക്കറികൾ ലഭ്യമായി തുടങ്ങിയിരുന്നു. ലഭ്യത പരിമിതമാണെങ്കിലും, വെള്ളരിക്ക, തക്കാളി തുടങ്ങിയ ചില ഇനങ്ങൾക്ക് വില സ്ഥിരതയോടെ നിലനിർത്താൻ അവ സഹായിച്ചിട്ടുണ്ട്.
മിക്ക പ്രാദേശിക ഫാമുകളും നവംബറോടെ കൂടുതൽ പച്ചക്കറികൾ വിതരണം ചെയ്യുമെന്ന് ഫാം ഉടമകളും മാനേജർമാരും കഴിഞ്ഞ ദിവസം വ്യക്തമാക്കി. വഴുതനങ്ങ, കാപ്‌സിക്കം, തക്കാളി, വിവിധ ഇലക്കറികൾ എന്നിവ ഇതിൽ ഉൾപ്പെടും. ഹരിതഗൃഹങ്ങളുടെയും പുതിയ കാർഷിക സാങ്കേതികവിദ്യയുടെയും ഉപയോഗം വിപുലീകരിച്ചത് ഉപയോഗിക്കാത്ത പ്രദേശങ്ങൾ കൃഷിയിടങ്ങളാക്കാൻ കർഷകരെ സഹായിച്ചിട്ടുണ്ട്.
ഈ വർഷം തന്റെ ഫാമിൽ ഏകദേശം 2,000 ടൺ പച്ചക്കറികൾ ഉൽപ്പാദിപ്പിക്കുമെന്ന് പ്രതീക്ഷിക്കുന്നതായി എഞ്ചിനീയർ അബ്ദുൾറഹ്മാൻ അഹമ്മദ് അൽ-ഒബൈദാൻ പറഞ്ഞു-കഴിഞ്ഞ വർഷത്തേക്കാൾ 500 ടൺ കൂടുതലാണിത്. കയറ്റുമതിക്ക് നിലവിൽ പദ്ധതികളില്ലാത്തതിനാൽ എല്ലാ ഉൽപ്പന്നങ്ങളും പ്രാദേശികമായി വിൽക്കും.
മറ്റൊരു ഫാം ഉടമയായ മുഹമ്മദ് അജ്‌ലാൻ അൽ-കാബി തൻ്റെ ഫാമിൽ ഈ സീസണിലെ ആദ്യത്തെ കുക്കുമ്പർ വിളവെടുപ്പ് നടത്തിയെന്നും ക്യാപ്‌സിക്കം, തക്കാളി തുടങ്ങിയവ ഉടനെ വരുമെന്നും പറഞ്ഞു. ഈ വർഷം, അദ്ദേഹത്തിൻ്റെ ഫാം 20 പുതിയ ഹരിതഗൃഹങ്ങൾ ചേർത്തത് ഉൽപാദനം വർദ്ധിപ്പിക്കാൻ സഹായിച്ചു.
