ദോഹ: കർണാടകയിലെ കോളേജുകളിൽ ഹിജാബ് വിലക്കുമായി ബന്ധപ്പെട്ടുയർന്ന വിവാദം ഖത്തർ ഉൾപ്പെടെ പശ്ചിമേഷ്യൻ രാജ്യങ്ങളിലെ സോഷ്യൽ മീഡിയയിലും ചർച്ചയായി. മുസ്ലീങ്ങൾ ജനസംഖ്യയുടെ 12% വരുന്ന കർണാടകയിലെ ദക്ഷിണേന്ത്യൻ പ്രവിശ്യയിലെ വിദ്യാഭ്യാസ സ്ഥാപനങ്ങളിൽ ഹിജാബ് നിരോധിക്കാനുള്ള തീരുമാനം ആഗോളതലത്തിലും ഖത്തറിലും രോഷത്തിന് കാരണമായതായി ദോഹ ന്യൂസ് റിപ്പോർട്ട് ചെയ്തു.
പർദ്ദ ധരിച്ച പെൺകുട്ടിയെ കോളേജിലെ കാവി ഷാൾ അണിഞ്ഞ ആൺകുട്ടികളുടെ സംഘം പ്രകോപനപരമായി പിന്തുടരുന്ന വൈറൽ വിഡിയോക്ക് പിന്നാലെ ബുധനാഴ്ചയാണ് വിഷയം ആഗോള ശ്രദ്ധയിൽപ്പെട്ടത്. ഇതേത്തുടർന്ന് മലാല യൂസഫ് സായ് അടക്കമുള്ളവർ പെണ്കുട്ടിക്ക് പിന്തുണയുമായി രംഗത്തെത്തിയിരുന്നു.
#HijabisOurRight എന്ന ഹാഷ്ടാഗ് ട്വിറ്ററിൽ അതിവേഗം പങ്കുവെക്കപ്പെട്ടു. ഖത്തറിലും ഹാഷ്ടാഗ് ട്രെൻഡിംഗ് ആയതോടെ വിഷയത്തിന്റെ നാനാവശങ്ങൾ ചർച്ചയിലെത്തി.
ബിജെപി ഗവൺമെന്റ് മുസ്ലീങ്ങളെ പാർശ്വവൽക്കരിക്കുകയാണെന്ന് ഉൾപ്പെടെയുള്ള ട്വീറ്റുകൾ ആക്ടിവിസ്റ്റുകളും പത്രപ്രവർത്തകരും മുന്നോട്ടു വെക്കുന്നുണ്ട്.
ഖത്തറിൽ, അൽ ജസീറ പത്രപ്രവർത്തകൻ ഗദാ ഔയിസ് ഇസ്‌ലാമോഫോബിയ പരാമർശിച്ച് “യഹൂദ വിരുദ്ധതയും ഇസ്ലാമോഫോബിയയും എല്ലാത്തരം വംശീയതയും അസഹിഷ്ണുതയും അവസാനിപ്പിക്കണം,” എന്ന് ട്വീറ്റ് ചെയ്തു.
മറ്റൊരു ഹാഷ്ടാഗ്, #India_Bans_The_Hijab (#الهند_تمنع_الحجاب), മിഡിൽ ഈസ്റ്റിലെ ട്രെൻഡുകളിൽ ഒന്നാമതെത്തി. വൈറൽ വീഡിയോയിലെ യുവ വിദ്യാർത്ഥിനിയുടെ ധീരതയെ ആളുകൾ പ്രശംസിക്കുന്നുണ്ട്.
“ഞങ്ങൾ നമ്മുടെ ഇന്ത്യൻ മുസ്ലീം സഹോദരിമാർക്കൊപ്പം നിൽക്കുകയും അവരുടെ വിദ്യാഭ്യാസം ന്യായമായി ലഭിക്കുന്നതിന് നീതി ലഭിക്കണമെന്ന് ആവശ്യപ്പെടുകയും വേണം,” ഒരു ട്വിറ്റർ ഉപയോക്താവ് പറഞ്ഞു.
“നിങ്ങൾ സ്വയം അഭിമാനിക്കണം [വീഡിയോയിലെ പെൺകുട്ടി]. സ്ത്രീകൾക്ക് തിരഞ്ഞെടുക്കാനുള്ള സ്വാതന്ത്ര്യത്തിനായി അവർ ആഹ്വാനം ചെയ്യുന്നു, എന്നാൽ ഒരു സ്ത്രീ ഹിജാബ് തിരഞ്ഞെടുക്കുമ്പോൾ അവർ സ്വാതന്ത്ര്യത്തിന്റെ ശത്രുക്കളെപ്പോലെയാണ് പ്രവർത്തിക്കുന്നത്. വൈരുദ്ധ്യങ്ങളുടെ വിചിത്ര ലോകം,” എന്ന ട്വീറ്റും ശ്രദ്ധേയമായി.
കഴിഞ്ഞ വർഷങ്ങളിലും ഇന്ത്യയിലെ സമാന സംഭവങ്ങളുടെ പശ്ചാത്തലത്തിൽ കടുത്ത പ്രതിഷേധ ഹാഷ് ടാഗുകൾ ഖത്തറിലെ ട്വിറ്ററുകളിൽ പ്രത്യക്ഷപ്പെട്ടിരുന്നു.
