രാജ്യമെമ്പാടും റെക്കോർഡ് ചൂട് റിപ്പോർട്ട് ചെയ്യപ്പെടുന്ന സാഹചര്യത്തിൽ, ഹീറ്റ് സ്ട്രോക്ക് പോലെയുള്ള ശാരീരിക അവസ്ഥകൾ സംബന്ധിച്ച് ഹമദ് മെഡിക്കൽ കോർപ്പറേഷൻ (എച്ച്എംസി) മുന്നറിയിപ്പ് നൽകി.
രാജ്യത്ത് താപനില വർദ്ധിക്കുന്നതിനനുസരിച്ച്, ഹീറ്റ് സ്ട്രോക്കിന്റെ ലക്ഷണങ്ങൾ തിരിച്ചറിയേണ്ടതിന്റെയും ആരോഗ്യസ്ഥിതിയുടെ അപകടസാധ്യത ലഘൂകരിക്കുന്നതിന്റെയും പ്രാധാന്യം HMC ചൂണ്ടിക്കാട്ടി. പകൽ 11 നും ഉച്ചകഴിഞ്ഞ് 3 നും ഇടയിലുള്ള ഏറ്റവും ചൂടേറിയ സമയങ്ങളിൽ വ്യക്തികൾ വീടിനുള്ളിൽ തന്നെ തുടരാൻ എച്ച്എംസി നിർദ്ദേശിച്ചിട്ടുണ്ട്.
ജൂലൈ 16 ന് ‘അൽ ഹനാ’ നക്ഷത്രം ആരംഭിക്കുന്നതായി ഖത്തർ കാലാവസ്ഥാ വകുപ്പ് (ക്യുഎംഡി) കഴിഞ്ഞ ദിവസം പ്രസ്താവിച്ചതിനെ തുടർന്നാണ് ഈ ജാഗ്രത പ്രഖ്യാപിച്ചിരിക്കുന്നത്. ചൂട് കൂടുന്നതിനും ഈർപ്പം വർദ്ധിക്കുന്നതിനും കാരണമാകുന്ന വേനൽ കാലഘട്ടത്തിന്റെ ഏറ്റവും തീവ്രമായ തലമാണ് ഇത്.
QMD പ്രകാരം, അടുത്ത 13 ദിവസങ്ങളിൽ താപനില ഗണ്യമായി ഉയരും. ഇത് ചൂടും ഈർപ്പവും വർദ്ധിപ്പിക്കും. കാലാവസ്ഥാ വ്യതിയാനങ്ങൾ നേരിയ മൂടൽമഞ്ഞ് രൂപപ്പെടുന്നതിനും കാറ്റ് കുറയ്ക്കുന്നതിനും കാരണമാകുമെന്നും പറയപ്പെടുന്നു.
വേനൽക്കാലത്ത് ഹീറ്റ്‌സ്ട്രോക്ക് വളരെ സാധാരണമാണ്. നേരിട്ട് സൂര്യപ്രകാശം ഏൽക്കുന്നത് മൂലം ഇത് ആളുകളെ ബാധിക്കുമെന്ന് എച്ച്എംസിയുടെ എമർജൻസി ഡിപ്പാർട്ട്‌മെന്റിലെ മെഡിക്കൽ റസിഡന്റ് ഡോ. ഐഷ അലി അൽ സാദ പറഞ്ഞു. കുട്ടികളും പ്രായമായവരും വിട്ടുമാറാത്ത രോഗങ്ങളുള്ളവരും കൂടുതൽ അപകടസാധ്യതയുള്ളവരാണ്.
ഒരാളുടെ ശരീരത്തിന് ഇനി താപനില നിയന്ത്രിക്കാൻ കഴിയാതെ വരുമ്പോൾ ഉണ്ടാകുന്ന ഗുരുതരമായ ചൂടുമായി ബന്ധപ്പെട്ട രോഗമാണ് ഹീറ്റ്‌സ്ട്രോക്ക്. ശരീരത്തിന്റെ ഊഷ്മാവ് അതിവേഗം ഉയരുന്നു. വിയർപ്പ് സംവിധാനം പരാജയപ്പെടുന്നു. തുടർന്ന് ശരീരത്തിന് സ്വയം തണുപ്പിക്കാനാവാതെ വരുന്നതോടെ ഹീറ്റ് സ്ട്രോക്കിന് ഉണ്ടാകുന്നു.
ഉയർന്ന ശരീര ഊഷ്മാവ്, വിയർപ്പ്, കടുത്ത ദാഹം, ഹൃദയമിടിപ്പ് കൂടുക, ചർമ്മത്തിന്റെ ചുവപ്പ്, തലവേദന, തലകറക്കം, ഓക്കാനം, ബോധക്ഷയം, കഠിനമായ ക്ഷീണം എന്നിവയാണ് ഹീറ്റ് സ്ട്രോക്കിന്റെ ലക്ഷണങ്ങൾ, ഡോ. അൽ സാദ വീഡിയോ സന്ദേശത്തിൽ പറഞ്ഞു.
ഹീറ്റ്‌സ്ട്രോക്ക് തടയാൻ, ധാരാളം ദ്രാവകവും വെള്ളവും കുടിക്കാനും ജലാംശം നിലനിർത്താനും അവർ നിർദ്ദേശിച്ചു. അയഞ്ഞ, സുഖപ്രദമായ, ഇളം നിറമുള്ള വസ്ത്രങ്ങൾ ധരിക്കുക; ഉച്ചയ്ക്ക് 11 മണി മുതൽ 3 മണി വരെ സൂര്യപ്രകാശം ഏൽക്കുന്നത് ഒഴിവാക്കുക, പ്രത്യേകിച്ച് കുട്ടികൾ, പ്രായമായവർ, വിട്ടുമാറാത്ത രോഗങ്ങളുള്ളവർ മുതലായവർ.
ഹീറ്റ്‌സ്ട്രോക്ക് ഉണ്ടായാൽ, ആളെ തണുത്ത സ്ഥലത്തേക്ക് മാറ്റി, തലയും തോളും ഉയർത്തി പുറകിൽ കിടത്തി, തണുത്ത വെള്ളം കുടിക്കാൻ കൊടുക്കുക, തണുത്ത പാഡുകൾ ഇടുക എന്നിവയിലൂടെ അടിയന്തിര പ്രഥമശുശ്രൂഷ നൽകണം.
“നിങ്ങൾക്ക് ക്ഷീണം തോന്നുമ്പോൾ ക്ഷീണിപ്പിക്കുന്ന ഏതൊരു പ്രവർത്തനവും നിർത്തുക; തണുത്ത വെള്ളത്തിൽ കുളിക്കുക, അല്ലെങ്കിൽ നിങ്ങളുടെ ശരീര താപനില കുറയ്ക്കാൻ തണുത്ത പാഡുകൾ ഉപയോഗിക്കുക,” ഡോ. അൽ സാദ പറഞ്ഞു.
30 മിനിറ്റിനു ശേഷവും വ്യക്തിയുടെ അവസ്ഥ മെച്ചപ്പെടുന്നില്ലെങ്കിലോ ശരീര താപനില 40 ഡിഗ്രി സെൽഷ്യസിനു മുകളിൽ ആണെങ്കിലോ 999 എന്ന നമ്പറിൽ വിളിച്ച് ആശുപത്രി സഹായം തേടണം.
ഇന്നത്തെ കാലാവസ്ഥാ പ്രവചനത്തിൽ ക്യുഎംഡി, രാവിലെ ചിലയിടങ്ങളിൽ മൂടൽമഞ്ഞ്, പകൽ സമയങ്ങളിൽ ചിലയിടങ്ങളിൽ ചൂടും നേരിയ പൊടിയും എന്നിവ പ്രവചിച്ചിട്ടുണ്ട്. ദോഹയിൽ തെർമോമീറ്റർ 44 ഡിഗ്രി സെൽഷ്യസിൽ എത്താൻ സാധ്യതയുണ്ട്. ഈർപ്പം പരമാവധി 90% വരെ എത്തുമെന്ന് പ്രവചിക്കപ്പെടുന്നു.
🇶🇦 ഖത്തറിലെ വാർത്തകളും വിവരങ്ങളും തത്സമയം ലഭിക്കാൻ -വാട്ട്സ്ആപ്പ് ഗ്രൂപ്പ്👇https://chat.whatsapp.com/Hqdo3Xy51yW9XU2HVyXb0j
