ദോഹ: വിശുദ്ധ റമദാൻ മാസത്തോടനുബന്ധിച്ച് ദോഹ മെട്രോയുടെയും ലുസൈൽ ട്രാമിന്റെയും പുതുക്കിയ പ്രവർത്തന സമയം ഖത്തർ റെയിൽ പ്രഖ്യാപിച്ചു. റമദാൻ മാസത്തിൽ യാത്രക്കാരുടെ സൗകര്യാർത്ഥം രാത്രി വൈകിയും സർവീസുകൾ ലഭ്യമായിരിക്കും.
പുതുക്കിയ സമയക്രമം:
- ശനി മുതൽ വ്യാഴം വരെ: ദോഹ മെട്രോ രാവിലെ 5:30 മണിക്ക് സർവീസ് ആരംഭിച്ച് പുലർച്ചെ 1:30 ന് അവസാനിക്കും. ലുസൈൽ ട്രാം പുലർച്ചെ 2 വരെ ഉണ്ടാകും.
- വെള്ളിയാഴ്ചകളിൽ: ദോഹ മെട്രോ രാവിലെ 9:30 മുതൽ പുലർച്ചെ 1:30 വരെയാണ് സർവീസ് ഉണ്ടായിരിക്കുക. ലുസൈൽ ട്രാം ഉച്ചക്ക് 2:30 മുതൽ പുലർച്ചെ 2:00 വരെയും ആയിരിക്കും.
റമദാനിലെ പ്രത്യേക സാഹചര്യങ്ങൾ പരിഗണിച്ച് കൂടുതൽ യാത്രക്കാർക്ക് പ്രയോജനകരമാകുന്ന രീതിയിലാണ് സർവീസ് സമയം പുലർച്ചെ ഒരു മണി വരെ നീട്ടിയിരിക്കുന്നത്. മെട്രോ ലിങ്ക് (metrolink), മെട്രോ എക്സ്പ്രസ് (metroexpress) സേവനങ്ങളും ഇതേ സമയക്രമം തന്നെ പിന്തുടരും.
യാത്രക്കാർക്ക് തിരക്കില്ലാതെ യാത്ര ചെയ്യുന്നതിനായി തിരക്കേറിയ സമയങ്ങളിൽ ട്രെയിനുകളുടെ എണ്ണം വർദ്ധിപ്പിക്കുമെന്നും ഖത്തർ റെയിൽ അറിയിച്ചു. റമദാൻ മാസത്തിൽ രാത്രികാലങ്ങളിൽ പുറത്തിറങ്ങുന്നവർക്കും ആരാധനാലയങ്ങളിൽ പോകുന്നവർക്കും ഈ നീട്ടിയ സമയം വലിയ ആശ്വാസമാകും.
