പ്രമുഖ ഫുഡ് ഡെലിവറി പ്ലാറ്റ്ഫോമായ ഡെലിവറൂ (Deliveroo) ഖത്തറിലെ തങ്ങളുടെ സേവനങ്ങൾ അവസാനിപ്പിക്കാൻ തീരുമാനിച്ചു. ആഗോളതലത്തിൽ കമ്പനി നടത്തുന്ന തന്ത്രപരമായ ബിസിനസ്സ് പുനഃക്രമീകരണങ്ങളുടെ ഭാഗമായാണ് ഈ നീക്കം. 2026 മാർച്ച് 4 വരെ മാത്രമേ ഖത്തറിലെ ഉപഭോക്താക്കൾക്ക് ഡെലിവറൂ ആപ്പ് വഴി സേവനങ്ങൾ ലഭ്യമാകൂ എന്നും അതിനുശേഷം കമ്പനി രാജ്യത്തെ പ്രവർത്തനം പൂർണ്ണമായും നിർത്തലാക്കുമെന്നും ഔദ്യോഗിക പത്രക്കുറിപ്പിൽ അറിയിച്ചു.
മറ്റ് വിപണികളിൽ കൂടുതൽ ശ്രദ്ധ കേന്ദ്രീകരിക്കുന്നതിനും ലാഭക്ഷമത വർദ്ധിപ്പിക്കുന്നതിനുമായാണ് കമ്പനി ഇത്തരമൊരു തീരുമാനമെടുത്തത്. ഖത്തറിലെ വിപണിയിൽ നിന്ന് പിന്മാറുന്നത് സംബന്ധിച്ച എല്ലാ നിയമപരമായ നടപടിക്രമങ്ങളും പാലിക്കുമെന്നും പ്രവർത്തനങ്ങൾ നിർത്തലാക്കുന്ന പ്രക്രിയയിൽ തങ്ങളുടെ ജീവനക്കാർക്കും ഡെലിവറി റൈഡർമാർക്കും റെസ്റ്റോറന്റ് പങ്കാളികൾക്കും ആവശ്യമായ എല്ലാ പിന്തുണയും ഉറപ്പാക്കുമെന്നും കമ്പനി വ്യക്തമാക്കി.
2022-ൽ ഖത്തറിൽ പ്രവർത്തനം ആരംഭിച്ച ഡെലിവറൂ ചുരുങ്ങിയ കാലയളവിനുള്ളിൽ മികച്ച ജനശ്രദ്ധ നേടിയിരുന്നു. ഖത്തറിലെ ഭക്ഷണ വിതരണ മേഖലയിൽ തലാബാത്, സ്നൂനു, റാഫിഖ് തുടങ്ങിയ കമ്പനികൾക്കിടയിൽ ശക്തമായ മത്സരം നിലനിൽക്കുന്ന സാഹചര്യത്തിലാണ് ഡെലിവറൂവിന്റെ ഈ അപ്രതീക്ഷിത പിന്മാറ്റം. മാർച്ച് 4 വരെ പതിവുപോലെ ഉപഭോക്താക്കൾക്ക് ആപ്പ് ഉപയോഗിക്കാമെന്നും അതിനുശേഷം സേവനം ലഭ്യമാകില്ലെന്നും കമ്പനി ഓർമ്മിപ്പിച്ചു.
