ഖത്തരി വിപണിയിൽ തങ്ങളുടെ സാന്നിധ്യം ശക്തിപ്പെടുത്തുന്നതിനായി ഇന്ത്യൻ ഓട്ടോമൊബൈൽ ഭീമൻ അശോക് ലെയ്ലാൻഡ് ഫാംകോ ഖത്തറുമായി പങ്കാളിത്തം പ്രഖ്യാപിച്ചു.
നവംബർ 17 ന് നടന്ന ഒരു പരിപാടിയിലാണ് ഇലക്ട്രിക് ബസുകൾ ഉൾപ്പെടെയുള്ള വാണിജ്യ വാഹന ശ്രേണി ഖത്തറിൽ പുറത്തിറക്കാൻ കമ്പനി ധാരണയായത്. ദോഹ എക്സിബിഷൻ ആൻഡ് കൺവെൻഷൻ സെന്ററിൽ വെച്ചാണ് ലോഞ്ച് നടന്നത്.
അശോക് ലെയ്ലാൻഡിന്റെ ഉൽപ്പന്ന ശ്രേണിയിൽ ഫാൽക്കൺ, ഓയിസ്റ്റർ ബസുകൾ, ബോസ് ആൻഡ് പാർട്ണർ ലൈറ്റ്, മീഡിയം ഡ്യൂട്ടി ട്രക്കുകൾ എന്നിവ ഉൾപ്പെടുന്നു. പരിസ്ഥിതി സൗഹൃദ മൊബിലിറ്റി വാഗ്ദാനം ചെയ്യുന്നതിനുള്ള പ്രതിബദ്ധത ഇലക്ട്രിക് ബസുകൾ കാണിക്കുന്നുവെന്ന് കമ്പനി പറഞ്ഞു.
2024 ൽ ഫാംകോ കെഎസ്എ വഴി അശോക് ലെയ്‌ലാന്‍ഡ് സൗദി അറേബ്യയിലേക്ക് വികസിപ്പിച്ചതിനെ തുടർന്നാണ് ഈ പങ്കാളിത്തം. ഫാംകോ ഖത്തർ അൽ-ഫുത്തൈം ഗ്രൂപ്പിന്‍റെ ഭാഗമാണ്. ഇന്ത്യയുടെ ഹിന്ദുജ ഗ്രൂപ്പിന്‍റെ 75 വർഷത്തിലേറെ വിപണിയിലുള്ള മുൻനിര കമ്പനിയാണ് അശോക് ലെയ്ലാൻഡ്.
മിഡിൽ ഈസ്റ്റിലെ കമ്പനിയുടെ ട്രാക്ക് റെക്കോർഡ് ശക്തിപ്പെടുത്തുന്നതിനൊപ്പം ഈ വിപണികളിലെ മൊബിലിറ്റിയുടെ ഭാവി രൂപപ്പെടുത്തുന്നതിനുള്ള ശക്തമായ പ്രതിബദ്ധതയാണ് ഖത്തറിലെ സാന്നിധ്യം തെളിയിക്കുന്നതെന്ന് അശോക് ലെയ്ലാൻഡിന്റെ ഇന്റർനാഷണൽ ഓപ്പറേഷൻസ് മേധാവി രാജേഷ് ആർ ഒരു പ്രസ്താവനയിൽ പറഞ്ഞു.
സൗദി അറേബ്യയിലെ വിജയത്തിനുശേഷം, അടിസ്ഥാന സൗകര്യങ്ങളിലും, ജനങ്ങളിലും, ഭാവിയിലും നിക്ഷേപം നടത്തുന്ന കമ്പനി ഖത്തറിലും അതേ സ്വാധീനം ഉണ്ടാക്കുന്നതിൽ അഭിമാനമുണ്ടെന്ന് അൽ-ഫുത്തൈം ഇൻഡസ്ട്രിയൽ എക്യുപ്‌മെന്റിന്റെ മാനേജിംഗ് ഡയറക്ടർ റമീസ് ഹംദാൻ പറഞ്ഞു.
