ദോഹ: ഡിസംബർ 18-ന് രാജ്യത്ത് അനുഭവപ്പെട്ട കനത്ത മഴയെ അഷ്ഗാലിന്റെ (പബ്ലിക് വർക്ക്സ് അതോറിറ്റി) ഫീൽഡ് ടീമുകൾ വിജയകരമായി കൈകാര്യം ചെയ്തതായി അധികൃതർ അറിയിച്ചു. ഏതാനും മണിക്കൂറുകൾക്കുള്ളിൽ തന്നെ മിക്ക റോഡുകളിലും ടണലുകളിലും ഗതാഗതം സാധാരണ നിലയിലാക്കിയതായും അഷ്ഗാൽ പറഞ്ഞു.
24 മണിക്കൂർ പ്രവർത്തിച്ച ഫീൽഡ് ടീമുകൾ
കാലാവസ്ഥാ മുന്നറിയിപ്പ് ലഭിച്ച നിമിഷം മുതൽ തന്നെ എല്ലാ മുൻകരുതൽ പദ്ധതികളും നടപ്പിലാക്കിയിരുന്നു. മുനിസിപ്പാലിറ്റികളുമായും ജനറൽ ഡയറക്ടറേറ്റ് ഓഫ് ട്രാഫിക്കുമായും ഏകോപിച്ച് ഫീൽഡ് ടീമുകൾ ഇരുപത്തിനാലു മണിക്കൂറും പ്രവർത്തിച്ച് വെള്ളക്കെട്ട് ഒഴിവാക്കാനും ഗതാഗതം സുഗമമാക്കാനും ഇടപെട്ടതായി അഷ്ഗാലിന്റെ സീവറേജ് ട്രീറ്റ്മെന്റ് പ്ലാന്റ് വിഭാഗത്തിലെ എഞ്ചിനീയർ മുഹമ്മദ് അൽ കുബൈസ്സി അറിയിച്ചു.
ഏറ്റവും കൂടുതൽ മഴ രേഖപ്പെടുത്തിയ പ്രദേശങ്ങൾ
കാലാവസ്ഥാ റിപ്പോർട്ടുകൾ പ്രകാരം അൽ കിരാന മേഖലയിൽ 90.4 മില്ലീമീറ്റർ, അൽ വക്റയിൽ 80.1 മില്ലീമീറ്റർ, അബു സമ്രയിൽ 71.5 മില്ലീമീറ്റർ മഴയാണ് രേഖപ്പെടുത്തിയതെന്ന് അൽ കുബൈസ്സി പറഞ്ഞു.
വൻതോതിൽ ഉപകരണങ്ങളും മനുഷ്യശേഷിയും വിന്യസിച്ചു
വെള്ളം നീക്കം ചെയ്യുന്നതിനായി 371-ലധികം വാട്ടർ ടാങ്കർ ട്രക്കുകളും, അടിയന്തര പ്രതികരണ സംഘങ്ങൾക്കായി 44-ത്തിലധികം മൊബൈൽ പമ്പുകളും വിന്യസിച്ചു. കൂടാതെ മഴ ഏറ്റവും കൂടുതൽ ബാധിച്ച മേഖലകളിൽ നിരവധി സാങ്കേതിക വിദഗ്ധരെയും തൊഴിലാളികളെയും നിയോഗിച്ചതായും അധികൃതർ വ്യക്തമാക്കി.
സ്റ്റേഡിയങ്ങൾക്കുചുറ്റും പ്രത്യേക ജാഗ്രത
ഫിഫ അറബ് കപ്പ് ഖത്തർ 2025 ഫൈനൽ നടന്ന ലുസൈൽ സ്റ്റേഡിയവും ഖലീഫ ഇന്റർനാഷണൽ സ്റ്റേഡിയവും അടങ്ങുന്ന പ്രദേശങ്ങളിൽ ഗതാഗതസുരക്ഷ ഉറപ്പാക്കാൻ പ്രത്യേക റാപിഡ് റെസ്പോൺസ് ടീമുകളെ വിന്യസിച്ചതായി അഷ്ഗാൽ അറിയിച്ചു.
ടണലുകൾ സുരക്ഷിതം; പരാതികൾ വേഗത്തിൽ പരിഹരിച്ചു
രാജ്യത്തുടനീളം 111 ടണലുകളാണ് അഷ്ഗാൽ നിരീക്ഷിക്കുന്നത്. മഴയെ തുടർന്ന് ഒരു ടണലിനും കേടുപാടുകൾ ഉണ്ടായിട്ടില്ലെന്നും അധികൃതർ വ്യക്തമാക്കി. വെള്ളക്കെട്ടുമായി ബന്ധപ്പെട്ട് ലഭിച്ച 414 പരാതികളും ആറു മണിക്കൂറിനുള്ളിൽ പരിഹരിച്ചതായും, മൈതർ, ഇൻഡസ്ട്രിയൽ ഏരിയ, മെബൈരീക്ക്, അൽ വക്റ എന്നിവയാണ് ഏറ്റവും കൂടുതൽ ബാധിച്ച മേഖലകളെന്നും അറിയിച്ചു.
പൊതുജനങ്ങൾക്ക് മുന്നറിയിപ്പ്
മഴക്കാലത്ത് വാഹനമോടിക്കുമ്പോൾ ജാഗ്രത പാലിക്കണമെന്ന് അഷ്ഗാൽ പൊതുജനങ്ങളോട് അഭ്യർത്ഥിച്ചു. അടിയന്തര സാഹചര്യങ്ങൾ റിപ്പോർട്ട് ചെയ്യാൻ 88 എന്ന നമ്പറിലെ കസ്റ്റമർ സർവീസ് സെന്ററുമായി ബന്ധപ്പെടാമെന്നും, അഷ്ഗാൽ ടീമുകൾ ഇപ്പോഴും ഫീൽഡിൽ നിരന്തരം പ്രവർത്തിച്ചുകൊണ്ടിരിക്കുകയാണെന്നും അതോറിറ്റി വ്യക്തമാക്കി.
