ദോഹ: ഹമദ് ബിൻ ഖലീഫ മെഡിക്കൽ സിറ്റിയിലെ വിവിധ ആശുപത്രികളിലേക്കുള്ള പ്രവേശന കവാടങ്ങളിലും റോഡുകളിലും പുതിയ ഗതാഗത പരിഷ്കാരങ്ങൾ ഏർപ്പെടുത്തിയതായി ഹമദ് മെഡിക്കൽ കോർപ്പറേഷൻ (HMC) അറിയിച്ചു. ഈ വരുന്ന ചൊവ്വാഴ്ച (മാർച്ച് 31, 2026) മുതലാണ് പുതിയ മാറ്റങ്ങൾ പ്രാബല്യത്തിൽ വരുന്നത്.
മെഡിക്കൽ സിറ്റിയിലെ പ്രധാന സ്ഥാപനങ്ങളായ ഖത്തർ റീഹാബിലിറ്റേഷൻ ഇൻസ്റ്റിറ്റ്യൂട്ട്, അംബുലേറ്ററി കെയർ സെന്റർ, വിമൻസ് വെൽനസ് ആൻഡ് റിസർച്ച് സെന്റർ, മെഡിക്കൽ കെയർ ആൻഡ് റിസർച്ച് സെന്റർ എന്നിവിടങ്ങളിലേക്കുള്ള പ്രധാന കവാടങ്ങളിൽ വൺവേ സംവിധാനം ഏർപ്പെടുത്തും. രോഗികൾക്കും സന്ദർശകർക്കും സുഗമമായ യാത്ര ഉറപ്പാക്കുന്നതിന്റെ ഭാഗമായാണ് ഈ നടപടി.
പുതിയ ക്രമീകരണമനുസരിച്ച്, വാഹനങ്ങൾ പാർക്ക് ചെയ്യാൻ പോകുന്നവർ അഹമ്മദ് ബിൻ അലി സ്ട്രീറ്റ് (Ahmed Bin Ali Street) ഉപയോഗിക്കണം. എന്നാൽ യാത്രക്കാരെ ഇറക്കുന്നതിനും (Drop-off) തിരികെ കയറ്റുന്നതിനും (Pick-up) എത്തുന്നവർ ഏഷ്യൻ 2006 റോഡ് (Asiad 2006 Road) വഴിയാണ് പോകേണ്ടത്. ഡ്രൈവർമാരെ സഹായിക്കുന്നതിനായി പുതിയ റൂട്ടുകൾ വ്യക്തമാക്കുന്ന മാപ്പും അധികൃതർ പുറത്തുവിട്ടിട്ടുണ്ട്. ആശുപത്രി സന്ദർശിക്കുന്നവർ പുതിയ നിർദ്ദേശങ്ങൾ പാലിക്കണമെന്ന് എച്ച്.എം.സി അഭ്യർത്ഥിച്ചു
