മുസ്ലീം രാഷ്ട്രത്തിൽ പരസ്പര സഹവർത്തിത്വം പ്രോത്സാഹിപ്പിക്കുക എന്ന ലക്ഷ്യത്തോടെ ഒരു മുസ്ലിം പള്ളിയും ഒരു ചർച്ചും രാജ്യത്തെ ആദ്യത്തെ ഔദ്യോഗിക സിനഗോഗും ഉൾക്കൊള്ളുന്ന ഒരു കേന്ദ്രം വ്യാഴാഴ്ച യുഎഇ ഉദ്ഘാടനം ചെയ്തു. തലസ്ഥാനമായ അബുദാബിയിൽ നിർമ്മിച്ച “അബ്രഹാമിക് ഫാമിലി ഹൗസ്” എന്നു നാമകരണം ചെയ്ത കേന്ദ്രം ഇത്തരത്തിലുള്ള ആദ്യത്തേതാണ്.
മൂന്ന് ആരാധനാലയങ്ങളും തുല്യ ഉയരമുള്ളതും ഒരേ ബാഹ്യ മാനങ്ങൾ പങ്കിടുന്നതുമാണ്. ഏകദേശം ഒരു നൂറ്റാണ്ട് കാലയളവിൽ അറബ് ലോകത്ത് ഉദ്ദേശ്യപൂർവം നിർമ്മിച്ച ആദ്യത്തെ സിനഗോഗ് കൂടി ഇതിൽ ഉൾപ്പെടുന്നു. ഗൾഫ് അറബ് മേഖലയിലെ മറ്റൊരു സിനഗോഗ് ബഹ്‌റൈനിൽ മാത്രമാണ് ഉള്ളത്. ഉദ്ഘാടന ചടങ്ങിൽ, യുകെ ചീഫ് റബ്ബി എഫ്രേം മിർവിസ് പുതിയ മോസസ് ബെൻ മൈമൺ സിനഗോഗിന്റെ പ്രവേശന കവാടത്തിൽ ഒരു മെസൂസ ഘടിപ്പിച്ചു.
സഹവർത്തിത്വത്തിന്റെ മാതൃകയായി പഠനത്തിനും സംവാദത്തിനുമുള്ള വേദിയാകും ഈ കേന്ദ്രമെന്ന് സെന്റർ പ്രസിഡന്റ് മുഹമ്മദ് ഖലീഫ അൽ മുബാറക് പറഞ്ഞു.
“മതപരമായ സേവനങ്ങൾ, ഗൈഡഡ് ടൂറുകൾ, ആഘോഷങ്ങൾ, വിശ്വാസം പര്യവേക്ഷണം ചെയ്യാനുള്ള അവസരങ്ങൾ എന്നിവയിൽ പങ്കെടുക്കാൻ സന്ദർശകരെ ക്ഷണിക്കുന്നു,” അദ്ദേഹം വെള്ളിയാഴ്ച പുറത്തിറക്കിയ പ്രസ്താവനയിൽ പറഞ്ഞു.
വെള്ളിയാഴ്ച, യു.എ.ഇ ചീഫ് റബ്ബി യെഹൂദ സർനയുടെ നേതൃത്വത്തിൽ പ്രാദേശിക ജൂത സമൂഹം സിനഗോഗിൽ ശബ്ബത്ത് പ്രാർത്ഥന നടത്തി. മേഖലയിൽ മറ്റൊരു ആരാധനാലയം തുറന്നതിന് യുഎഇയെ ഗൾഫ് ജൂത കമ്മ്യൂണിറ്റീസ് അസോസിയേഷൻ പ്രശംസിച്ചു.
ഞായറാഴ്ച, യുഎഇ പ്രസിഡന്റ് മുഹമ്മദ് ബിൻ സായിദ് അൽ നഹ്യാൻ സമ്മാനിച്ച തോറ സ്ക്രോൾ സമർപ്പണ ചടങ്ങിൽ സിനഗോഗിലേക്ക് കൊണ്ടുവരും.
2020-ലെ യുഎഇയും ഇസ്രായേലും തമ്മിലുള്ള ബന്ധം സാധാരണ നിലയിലാക്കുന്നത് യുഎസ് ഇടനിലക്കാരായ അബ്രഹാം കരാറിന്റെ ഭാഗമായിരുന്നു. ഇതിന്റെ ഭാഗമായി ഇസ്രായേൽ ബഹ്‌റൈനുമായും മൊറോക്കോയുമായും നയതന്ത്ര ബന്ധം സ്ഥാപിക്കുകയും ചെയ്തു.
ഇസ്രായേലുമായുള്ള ബന്ധം സാധാരണ നിലയിലാക്കിയ ആദ്യത്തെ ഗൾഫ് രാജ്യവും ഈജിപ്തിനും ജോർദാനും ശേഷം അങ്ങനെ ചെയ്യുന്ന മൂന്നാമത്തെ അറബ് രാഷ്ട്രവുമാണ് യുഎഇ.
അധിനിവേശ പ്രദേശങ്ങളിൽ നിന്ന് പിന്മാറുകയും ഫലസ്തീൻ രാഷ്ട്രപദവി അംഗീകരിക്കുകയും ചെയ്യുന്നതുവരെ ഇസ്രായേലിനെ ഒറ്റപ്പെടുത്താനുള്ള ദീർഘകാല പാൻ-അറബ് നയം അബ്രഹാം ഉടമ്പടി ലംഘിക്കുന്നുണ്ട്.
🇶🇦 ഖത്തറിലെ വാർത്തകളും വിവരങ്ങളും തത്സമയം ലഭിക്കാൻ -വാട്ട്സ്ആപ്പ് ഗ്രൂപ്പ്👇https://chat.whatsapp.com/KNjF4YIFR12BVGJHu9svlJ
