വിശുദ്ധ റമദാൻ മാസത്തിൽ ദശലക്ഷക്കണക്കിന് ആളുകൾക്ക് ആശ്വാസമായി ഖത്തർ ഔഖാഫ് ഇസ്ലാമിക കാര്യ മന്ത്രാലയം ഒരുക്കിയ ഇഫ്താർ പദ്ധതികൾ സജീവമായി തുടരുന്നു. അൽ വക്രയിലെ സൂഖ് അൽ വക്രയിൽ സജ്ജീകരിച്ചിരിക്കുന്ന കൂറ്റൻ ഇഫ്താർ ടെന്റിൽ ഓരോ ദിവസവും ശരാശരി 1,500 ഓളം പേർക്കാണ് നോമ്പുതുറ സൗകര്യങ്ങൾ ഒരുക്കുന്നത്. മന്ത്രാലയത്തിന് കീഴിലെ ജനറൽ ഡിപ്പാർട്ട്മെന്റ് ഓഫ് എൻഡോവ്മെന്റ്സ് (അൽ ഖുലൈഫി) നടപ്പിലാക്കുന്ന ‘ഇഫ്താർ സൈം’ പദ്ധതിയുടെ ഭാഗമായാണ് ഈ വിപുലമായ സംവിധാനം ഒരുക്കിയിരിക്കുന്നത്.
ഏറ്റവും മികച്ച നിലവാരത്തിലുള്ള ഭക്ഷണവും സൗകര്യങ്ങളുമാണ് ഇവിടെ എത്തുന്ന നോമ്പുകാർക്കായി ഒരുക്കിയിരിക്കുന്നത്. കൃത്യമായ ശുചിത്വ മാനദണ്ഡങ്ങൾ പാലിച്ചുകൊണ്ട് തയ്യാറാക്കുന്ന വിഭവങ്ങൾ സന്നദ്ധപ്രവർത്തകരുടെ സഹായത്തോടെയാണ് വിതരണം ചെയ്യുന്നത്. അൽ വക്രയിലെയും പരിസര പ്രദേശങ്ങളിലെയും പ്രവാസികളും തൊഴിലാളികളും ഉൾപ്പെടെയുള്ള വലിയൊരു വിഭാഗം ഈ സേവനം പ്രയോജനപ്പെടുത്തുന്നുണ്ട്. വക്രയ്ക്ക് പുറമെ രാജ്യത്തിന്റെ വിവിധ ഭാഗങ്ങളിലായി പത്തിലധികം പ്രധാന കേന്ദ്രങ്ങളിൽ ഇത്തരത്തിലുള്ള ഇഫ്താർ ടെന്റുകൾ ഔഖാഫ് പ്രവർത്തിപ്പിക്കുന്നുണ്ട്.
സാമൂഹിക ഐക്യദാർഢ്യം വർദ്ധിപ്പിക്കുക എന്ന ലക്ഷ്യത്തോടെ നടപ്പിലാക്കുന്ന ഈ പദ്ധതിക്ക് വലിയ സ്വീകാര്യതയാണ് ലഭിക്കുന്നത്. വിവിധ രാജ്യക്കാരായ ആളുകൾ ഒരേ പന്തിയിൽ ഇരുന്നു നോമ്പുതുറക്കുന്ന കാഴ്ച റമദാന്റെ സാഹോദര്യ സന്ദേശത്തെ വിളിച്ചോതുന്നു. ഈ വർഷം റമദാനിലുടനീളം പ്രതിദിനം പതിനായിരക്കണക്കിന് ആളുകൾക്ക് ഭക്ഷണം എത്തിക്കാൻ ലക്ഷ്യമിട്ടുള്ള വിപുലമായ പദ്ധതികളാണ് മന്ത്രാലയം ആവിഷ്കരിച്ചിരിക്കുന്നത്. ഔഖാഫിന്റെ എൻഡോവ്മെന്റ് ഫണ്ടിൽ നിന്നുള്ള പിന്തുണയോടെയാണ് ഈ പുണ്യപ്രവൃത്തികൾ നടക്കുന്നത്.
