ന്യൂയോർക്കിലെ യുഎൻ ആസ്ഥാനത്ത് ഇന്നലെ നടന്ന 77-ാമത് യുഎൻ ജനറൽ അസംബ്ലിയുടെ (UNGA) ഉദ്ഘാടന സെഷനിൽ അമീർ ഷെയ്ഖ് തമീം ബിൻ ഹമദ് അൽ താനി പ്രസംഗിച്ചു.
“2022 ലോകകപ്പിന് ആതിഥേയത്വം വഹിക്കുന്ന ഖത്തർ ഈ വർഷം നവംബറിൽ ലോകത്തെ സ്വാഗതം ചെയ്യും. ലോകമെമ്പാടുമുള്ള ടീമുകൾക്കും ആരാധകർക്കുമായി ഫുട്ബോളും ലോകകപ്പ് അന്തരീക്ഷവും ആവേശത്തോടെ ആസ്വദിക്കാൻ ഞങ്ങൾ വിവേചനരഹിതമായി വാതിലുകൾ തുറക്കുകയാണ്,” പ്രഭാഷണത്തിൽ അമീർ പറഞ്ഞു.
COVID-19 പാൻഡെമിക്കിന് ശേഷം ഇതാദ്യമായാണ് 193 യുഎൻ അംഗരാജ്യങ്ങളിൽ നിന്നുള്ള ലോക നേതാക്കൾ നേരിട്ട് ഒത്തുകൂടുന്നത്. ഈ വർഷത്തെ യുഎൻജിഎയുടെ തീം, “പരസ്പര ബന്ധിതമായ വെല്ലുവിളികൾക്കുള്ള പരിവർത്തന പരിഹാരങ്ങൾ (A watershed moment: transformative solutions to interlocking challenges)” എന്നുള്ളതാണ്.
റഷ്യയും ഉക്രൈനും തമ്മിലുള്ള സംഘർഷത്തിന് ഞങ്ങൾ വെടിനിർത്തലിനും സമാധാനപരമായ പരിഹാരത്തിനും ആഹ്വാനം ചെയ്യുന്നതായി അമീർ പറഞ്ഞു.
അധിനിവേശം അവസാനിപ്പിച്ച് ഫലസ്തീൻ രാഷ്ട്രം സ്ഥാപിക്കാൻ ഇസ്രായേലിനെ നിർബന്ധിക്കുന്നതിനുള്ള ഉത്തരവാദിത്തം സുരക്ഷാ കൗൺസിൽ ഏറ്റെടുക്കണമെന്നും നീതിക്കായുള്ള അവരുടെ അഭിലാഷത്തിൽ പൂർണ്ണമായ ഐക്യദാർഢ്യം ആവർത്തിക്കുന്നതായും അമീർ വ്യക്തമാക്കി.
വിവിധ പ്രാദേശിക അന്താരാഷ്ട്ര വിഷയങ്ങളിലും അമീർ ഷെയ്ഖ് തമീം നിലപാട് വിശദീകരിച്ചു.
“ഇറാഖ്, ലെബനൻ, യെമൻ എന്നിവിടങ്ങളിൽ ദേശീയ സമവായം കൈവരിക്കുമെന്ന് ഞങ്ങൾ പ്രതീക്ഷിക്കുന്നു; ലിബിയയിലെ രാഷ്ട്രീയ പ്രക്രിയ പൂർത്തീകരിക്കാനും തിരഞ്ഞെടുപ്പിനുള്ള ഭരണഘടനാ അടിസ്ഥാനത്തിലുള്ള ഉടമ്പടിയും ഞങ്ങൾ ആവശ്യപ്പെടുന്നു.”
“അഫ്ഗാനിസ്ഥാനിലെ സിവിലിയന്മാരെ സംരക്ഷിക്കേണ്ടതിന്റെ ആവശ്യകത, സ്ത്രീകളുടെ അവകാശങ്ങൾ, വിദ്യാഭ്യാസത്തിനുള്ള അവകാശം, പാർട്ടികൾ തമ്മിലുള്ള അനുരഞ്ജനം എന്നിവയെക്കുറിച്ച് ഞങ്ങൾ ആവർത്തിച്ച് ഊന്നിപ്പറഞ്ഞിട്ടുണ്ട്, അഫ്ഗാനിസ്ഥാനെ ഒറ്റപ്പെടുത്തുന്നതിന്റെ അപകടത്തെക്കുറിച്ചും അതിന്റെ വിപരീത ഫലങ്ങളെക്കുറിച്ചും ഞങ്ങൾ മുന്നറിയിപ്പ് നൽകിയിട്ടുണ്ട്.”
ലോകം അഭൂതപൂർവമായ ഊർജ്ജ പ്രതിസന്ധിയെ അഭിമുഖീകരിക്കുകയാണെന്നും ലോകത്തിലെ ഒരു ബില്യൺ ആളുകൾക്ക് വിശ്വസനീയമായ പ്രാഥമിക ഊർജ്ജ സ്രോതസില്ലെന്നും അമീർ പ്രഭാഷണത്തിൽ പരാമർശിച്ചു.
