ഹമാസ് തടവിലാക്കിയ ഇസ്രായേലി ബന്ദികളെ മോചിപ്പിക്കാൻ ഇടപെടണമെന്നാവശ്യപ്പെട്ട്, ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിൻ്റെ ഭാര്യ സാറ നെതന്യാഹു ഖത്തർ അമീർ ഷെയ്ഖ് തമീമിൻ്റെ മാതാവ് ഷെയ്ഖ മോസ ബിൻത് നാസറിന് അപേക്ഷ നൽകിയതായി ജിസിസി മാധ്യമങ്ങൾ റിപ്പോർട്ട് ചെയ്തു. ഇസ്രായേൽ പ്രധാനമന്ത്രിയുടെ ഓഫീസും ഇക്കാര്യം വെളിപ്പെടുത്തിയിട്ടുണ്ട്.
“ഖത്തറിന്റെ വിലമതിക്കാനാകാത്ത പിന്തുണയ്‌ക്കായി” നന്ദി പറഞ്ഞു കൊണ്ടാണ് നെതന്യാഹു കത്ത് ആരംഭിക്കുന്നത്. “സമാധാനത്തിൻ്റെയും മാനവികതയുടെയും മൂല്യങ്ങൾ ഉയർത്തിപ്പിടിക്കണമെന്ന് റമദാൻ ഓർമ്മിപ്പിക്കുന്നതായി കത്തിന്റെ മുഖവുരയിൽ പറയുന്നു.
“ഐക്യത്തിൻ്റെയും മാനുഷിക മൂല്യങ്ങളുടെയും ഈ വേളയിൽ ഞാൻ വളരെ അടിയന്തിരമായി, ഇസ്രായേലിൽ നിന്ന് തട്ടിക്കൊണ്ടുപോയി ഗാസയിൽ ഹമാസ് തടവിൽ വച്ചിരിക്കുന്ന ആളുകളുടെ അവസ്ഥ അഭിസംബോധന ചെയ്യാൻ ആഗ്രഹിക്കുന്നു. ബന്ദികളാക്കപ്പെട്ടവരിൽ 19 സ്ത്രീകൾ സങ്കൽപ്പിക്കാൻ പോലും കഴിയാത്ത ബുദ്ധിമുട്ടുകൾ സഹിക്കുന്നുണ്ട് എന്നത് അഭിസംബോധന ചെയ്യേണ്ടത് അനിവാര്യമാണ്.”
“അവരുടെ തിരിച്ചുവരവിനായി കാത്തിരിക്കുന്ന അവരുടെ കുടുംബങ്ങളുടെ വേദന നമ്മുടെ ഹൃദയത്തിൽ ആഴത്തിൽ പ്രതിധ്വനിക്കുന്നു, ജീവൻ്റെ വിലയെക്കുറിച്ചും അത് സംരക്ഷിക്കാൻ ഒരുമിച്ച് നിൽക്കേണ്ടതിൻ്റെ പ്രാധാന്യത്തെക്കുറിച്ചും നമ്മെ ഓർമ്മിപ്പിക്കുന്നു,” കത്തിൽ പറയുന്നു.
“ഇസ്രായേൽ ബന്ദികളുടെ മോചനത്തിനായി പ്രവർത്തിക്കാൻ നിങ്ങളുടെ സ്വാധീനം പ്രയോജനപ്പെടുത്താൻ റംസാൻ്റെ ആത്മാവിൽ ഞാൻ നിങ്ങളോട് അഭ്യർത്ഥിക്കുന്നു,” അവർ കൂട്ടിച്ചേർത്തു.
ഇസ്രയേലും ഹമാസും തമ്മിൽ വെടിനിർത്തൽ കരാറിലെത്താൻ അടുത്ത ആഴ്‌ചകളിൽ നടന്ന പുതിയ ശ്രമങ്ങൾക്കിടയിലാണ് നെതന്യാഹുവിൻ്റെ അഭ്യർഥന.
2023 ഒക്‌ടോബർ 7 മുതൽ ഗാസയ്‌ക്കെതിരായ ഇസ്രായേൽ യുദ്ധം 31,000-ലധികം സിവിലിയൻ മരണങ്ങൾക്കും അടിസ്ഥാന സൗകര്യങ്ങളുടെ നാശത്തിനും പലസ്തീനിലെ ഗുരുതരമായ വംശഹത്യക്കും കാരണമായി. റമദാൻ ആരംഭിച്ചിട്ടും ഇസ്രായേൽ വെടിനിർത്തലിന് തയ്യാറായിട്ടില്ല.
🇶🇦 ഖത്തറിലെ വാർത്തകളും വിവരങ്ങളും തത്സമയം ലഭിക്കാൻ -വാട്ട്സ്ആപ്പ് ഗ്രൂപ്പ്👇https://chat.whatsapp.com/KzKal0sXKHF3P2dagEwpi5
