റിയൽ എസ്റ്റേറ്റ് റിസർച്ച് പ്ലാറ്റ്‌ഫോമായ ഹപോണ്ടോയുടെ കണക്കനുസരിച്ച്, ഖത്തറിലുടനീളമുള്ള പ്രധാന ഏരിയകളിലെ റെസിഡൻഷ്യൽ അപ്പാർട്ട്‌മെൻ്റുകളുടെ ശരാശരി വാടക 2024ന്റെ മൂന്നാം പാദത്തിൽ ഗണ്യമായി ഉയർന്നു.
ജൂലൈ മുതൽ സെപ്‌തംബർ വരെ, പ്രധാന അപ്പാർട്ട്മെൻ്റ് മാർക്കറ്റുകളിൽ വാടകയിൽ ഗണ്യമായ വർദ്ധനവ് രേഖപ്പെടുത്തി. വെസ്റ്റ് ബേ ഏരിയയിലെ വൺ ബെഡ്‌റൂം അപ്പാർട്ട്‌മെൻ്റിൻ്റെ ശരാശരി വാടക പ്രതിമാസം 7 ശതമാനം ഉയർന്ന് QR9,760 ആയി, ലുസൈലിൻ്റെ മറീന ഡിസ്ട്രിക്റ്റിൽ ഇത് 4.5 ശതമാനം വർധിച്ച് QR7,980 ആയി.
ടു ബെഡ്‌റൂം അപ്പാർട്ട്മെൻ്റ് വിഭാഗത്തിൽ, വെസ്റ്റ് ബേയിലും മറീനയിലും മൂന്നാം ശ്രദ്ധേയമായ വാടക വർദ്ധനവ് ഉണ്ടായിട്ടുണ്ട്. എന്നിരുന്നാലും, പേൾ ഖത്തറിലെ വാടക സ്ഥിരമായി തുടരുന്നു, വൺ ബെഡ്‌റൂം അപ്പാർട്ട്‌മെൻ്റുകൾക്ക് പ്രതിമാസം QR8,490, ടു ബെഡ്‌റൂം അപ്പാർട്ടുമെൻ്റുകൾ QR11,500 എന്നിങ്ങനെയാണ് വാടക.
ഫോക്‌സ് ഹിൽസിൽ, വൺ ബെഡ്‌റൂം അപ്പാർട്ട്‌മെൻ്റിൻ്റെ ശരാശരി വാടക പ്രതിമാസം QR5,800 ആണ്, എന്നാൽ ടു ബെഡ്‌റൂം അപ്പാർട്ട്‌മെൻ്റുകളുടെ ശരാശരി വാടക ഏകദേശം 3 ശതമാനം കുറഞ്ഞിട്ടുണ്ട്.
വർഷത്തിൻ്റെ രണ്ടാം പാദത്തിൽ വെസ്റ്റ് ബേയിലും മറീനയിലും വാടക കുറഞ്ഞെങ്കിലും, ഇപ്പോൾ വർധനവാണ് കാണിക്കുന്നത്. അൽ സദ്ദിൽ വൺ ബെഡ്‌റൂം അപ്പാർട്ട്‌മെൻ്റിൻ്റെ വാടക 6.6 ശതമാനവും ഓൾഡ് എയർപോർട്ട് ഏരിയയിൽ 3 ശതമാനവും വർധിച്ചു. അതേസമയം, അൽ മൻസൂറ, ദോഹ ജദീദ്, നജ്‌മ തുടങ്ങിയ സ്ഥലങ്ങളിൽ മുൻ പാദങ്ങളെ അപേക്ഷിച്ച് വാടകയിൽ 8 ശതമാനം കുറവുണ്ടായി.
ഇടത്തരം വില്ലകളുടെ (മൂന്ന് മുതൽ അഞ്ച് വരെ കിടപ്പുമുറികൾ) മീഡിയൻ വാടകയും വർധിച്ചിട്ടുണ്ട്. ദി പേളിൽ, ശരാശരി വാടക പ്രതിമാസം QR29,930 ൽ നിന്ന് QR30,900 ആയി ഉയർന്നു. കൂടാതെ, വെസ്റ്റ് ബേ, അൽ ഹിലാൽ, ഐൻ ഖാലിദ് തുടങ്ങിയ പ്രദേശങ്ങളിൽ, ഇടത്തരം വില്ലകളുടെ ശരാശരി വാടക പ്രതിമാസം QR500 മുതൽ QR1,000 വരെ വർദ്ധിച്ചു. അൽ മമൂറ, ഓൾഡ് എയർപോർട്ട്, അൽ വാബ് എന്നിവിടങ്ങളിൽ വാടക സ്ഥിരമായി തുടർന്നു.
റെസിഡൻഷ്യൽ റിയൽ എസ്റ്റേറ്റ് വിപണിയിലെ വർദ്ധിച്ചുവരുന്ന ഡിമാൻഡും രാജ്യത്ത് വർദ്ധിച്ചുവരുന്ന ജനസംഖ്യയുമാണ് വാടക കുതിച്ചുചാട്ടത്തിനുള്ള പ്രധാന കാരണമെന്ന് റിപ്പോർട്ടുകൾ സൂചിപ്പിക്കുന്നു. ദേശീയ ആസൂത്രണ കൗൺസിലിൻ്റെ ഏറ്റവും പുതിയ കണക്കുകൾ പ്രകാരം ഖത്തറിലെ ജനസംഖ്യ 2024 ജൂണിൽ 2.8 ദശലക്ഷത്തിൽ നിന്ന് ഓഗസ്റ്റിൽ 3.05 ദശലക്ഷമായി വർദ്ധിച്ചു, ജനസംഖ്യയുടെ 48 ശതമാനത്തിലധികം പ്രവാസികളാണ്.
