ലോകകപ്പിൽ നിന്ന് പ്രതീക്ഷിക്കുന്ന ലാഭം 17 ബില്യൺ ഡോളറാണെന്ന് ഖത്തർ 2022 ലോകകപ്പ് സിഇഒ നാസർ അൽ ഖാതർ പറഞ്ഞു. അൽ-ജസീറ പോഡ്‌കാസ്റ്റിലെ ഖദീജ ബിൻ ക്വീനയോട് സംസാരിക്കുകയായിരുന്നു അദ്ദേഹം.
ലോകകപ്പിനുള്ള അടിസ്ഥാന സൗകര്യങ്ങളുടെയും നിർമാണച്ചെലവുകളുടെയും ചെലവ് 8 ബില്യൺ ഡോളറിലെത്തിയെന്നും ഇത് മുൻ ലോകകപ്പുകളുടെ ചെലവിനോട് താരതമ്യേന അടുത്താണെന്നും അദ്ദേഹം വെളിപ്പെടുത്തി.
“ഇതിനർത്ഥം ഞങ്ങൾ ചെലവിന്റെ ഇരട്ടി വരുമാനം നേടുമെന്നും ടൂർണമെന്റിനിടയിലും ശേഷവും രാജ്യം ലോകകപ്പിന്റെ ഫലം കൊയ്യുമെന്നുമാണ്.”
ഖത്തറിന് പുറത്ത് നിന്ന് ലോകകപ്പ് പിന്തുടരുന്നവരുടെ എണ്ണം റെക്കോർഡ് തലത്തിലെത്തുമെന്നും അദ്ദേഹം ചൂണ്ടിക്കാട്ടി. സുപ്രീം കമ്മിറ്റി ഫോർ ഡെലിവറി ആൻഡ് ലെഗസി നടത്തിയ പഠനങ്ങൾ അനുസരിച്ച്, ലോകമെമ്പാടുമുള്ള 3 മുതൽ 4 ബില്യൺ ആളുകൾ വരെ ഖത്തർ ലോകകപ്പ് കാണുമെന്ന് പ്രതീക്ഷിക്കുന്നു.
ഏതാനും ആഴ്ചകൾക്കുള്ളിൽ ഖത്തറിലെത്തുന്ന വലിയൊരു വിഭാഗം ആളുകളെ കുറിച്ചും അവരെ നേരിടാൻ ഖത്തറിന്റെ സന്നദ്ധതയെ കുറിച്ചുമുള്ള ചോദ്യത്തിന് ഖത്തർ ലോകകപ്പിന് പൂർണ സജ്ജമാണെന്ന് അൽ ഖത്തർ ഉറപ്പുനൽകി.
ലോകകപ്പ് വേളയിൽ 12,000 മാധ്യമ പ്രവർത്തകർ ഉൾപ്പെടെ ഒരു ദശലക്ഷത്തോളം ആളുകൾക്കായി ഖത്തർ കാത്തിരിക്കുകയാണെന്ന് അദ്ദേഹം പറഞ്ഞു.
