ന്യൂയോർക്കിൽ നടന്ന 79ആമത് യുഎൻ ജനറൽ അസംബ്ലിയിൽ പലസ്‌തീൻ അഭയാർത്ഥികൾക്കായുള്ള യുഎൻ റിലീഫ് ആൻഡ് വർക്ക്‌സ് ഏജൻസിയെ (UNRWA) പിന്തുണയ്ക്കുന്നതിനുള്ള യോഗത്തിൽ ഖത്തർ പങ്കെടുത്തു.
ഈ യോഗത്തിൽ ഖത്തറിനെ പ്രതിനിധീകരിച്ച് അന്താരാഷ്ട്ര സഹകരണ സഹമന്ത്രി ലോൽവ ബിൻത് റാഷിദ് അൽ ഖാതറാണ് പങ്കെടുത്തത്. യുഎൻആർഡബ്ല്യുഎയ്ക്കുള്ള പിന്തുണ ഉൾപ്പെടെ ഗാസയിലെ മാനുഷിക പ്രതിസന്ധി പരിഹരിക്കാൻ ഖത്തർ 100 മില്യൺ ഡോളർ അധികമായി നൽകുമെന്ന് അവർ പ്രഖ്യാപിച്ചു. ഗാസയിൽ മാനുഷിക സഹായം നൽകുന്നതിന് യുഎൻആർഡബ്ല്യുഎയെ പിന്തുണയ്ക്കാൻ അന്താരാഷ്ട്ര സമൂഹം ഒന്നിക്കണമെന്ന് അവർ ആഹ്വാനം ചെയ്‌തു
പലസ്‌തീൻ അഭയാർഥികളെ സഹായിക്കുന്നതിലെ സുപ്രധാന പങ്ക് തിരിച്ചറിഞ്ഞുകൊണ്ട് യുഎൻആർഡബ്ല്യുഎയെ പിന്തുണയ്ക്കുന്നതിനുള്ള പ്രതിജ്ഞാബദ്ധതയിൽ ഒപ്പുവെച്ച ആദ്യ രാജ്യങ്ങളിലൊന്നാണ് ഖത്തർ എന്നതിൽ അൽ ഖാതർ അഭിമാനം പ്രകടിപ്പിച്ചു. യുഎൻആർഡബ്ല്യുഎയെ ഒരു ഭീകരസംഘടനയായി മുദ്രകുത്താനുള്ള ശ്രമങ്ങളെ അവർ ശക്തമായി നിരസിച്ചു.
ഖത്തർ യുഎൻആർഡബ്ല്യുഎയിലേക്കുള്ള സംഭാവനകൾ തുടർച്ചയായി വർധിപ്പിച്ചിട്ടുണ്ട്, 2018ൽ ഏജൻസിയുമായി ഒന്നിലധികം വർഷത്തെ കരാറിൽ ഒപ്പുവെക്കുന്ന ആദ്യത്തെ അറബ് രാജ്യമായി ഖത്തർ മാറിയിരുന്നു. പലസ്‌തീൻ ജനതയുടെ ദുരിതങ്ങൾ ലഘൂകരിക്കാനും വിവിധ രൂപങ്ങൾ നൽകാനും ഖത്തർ യുഎൻആർഡബ്ല്യുഎയുമായി തുടർന്നും പ്രവർത്തിക്കുമെന്ന് അവർ സൂചിപ്പിച്ചു.
ഗാസയിൽ നടന്നുകൊണ്ടിരിക്കുന്ന അക്രമങ്ങൾ, വെസ്റ്റ് ബാങ്കിലെ സൈനിക നടപടികൾ, ലെബനനിലെ സമീപകാല സംഘർഷങ്ങൾ എന്നിവ കാരണം ഈ മീറ്റിംഗ് വളരെ പ്രധാനമാണെന്ന് അവർ ഊന്നിപ്പറഞ്ഞു. ഗുരുതരമായ മാനുഷിക പ്രതിസന്ധിയും മേഖലയിൽ അസ്ഥിരതയും നിലനിൽക്കുന്നുണ്ടെന്ന് അവർ വ്യക്തമാക്കി.
