ഖത്തർ എയർവേയ്‌സ് ഇന്ത്യയിൽ നടത്തുന്ന റിക്രൂട്ടിംഗ് ഡ്രൈവിലേക്ക് അപേക്ഷകരുടെ വൻ പ്രളയം. “ഏവിയേഷൻ വ്യവസായ ചരിത്രത്തിലെ ഏറ്റവും വലിയ പ്രതിഭാ സമ്പാദന”മായി കമ്പനി വിശേഷിപ്പിക്കുന്ന റിക്രൂട്ട്‌മെന്റ് ആണ് ഇപ്പോൾ നടക്കുന്നത്.
2022 സെപ്റ്റംബർ 29-30 തീയതികളിൽ ഹിൽട്ടൺ മുംബൈയിലാണ് എയർലൈൻ ഓപ്പൺ റിക്രൂട്ടിംഗ് പരിപാടി നടത്തിയത്. ഖത്തർ എയർവേയ്‌സിന്റെ വാക്ക്-ഇൻ ഇന്റർവ്യൂവിനായി ഹോട്ടലിന് പുറത്ത് നീണ്ട നിരകൾ കാണപ്പെട്ടു. വൻ തിരക്ക് കാരണം എയർലൈൻസിന് നിരവധി അപേക്ഷകരെയാണ് തിരിച്ചയക്കേണ്ടി വന്നത്.
മുംബൈയിലെ ഹോട്ടലിന് പുറത്ത് ദൃശ്യമായ നീണ്ട ക്യൂകളുടെ നിരവധി വീഡിയോകളും ചിത്രങ്ങളും സോഷ്യൽ മീഡിയയിൽ ഉയർന്നു വന്നു. സോഷ്യൽ മീഡിയയിൽ പലരും ഇതിനെ “ഏറ്റവും ദൈർഘ്യമേറിയ അഭിമുഖ ക്യൂ” എന്ന് വിശേഷിപ്പിച്ചു.
നിയന്ത്രണ പരിധിയില്ലാതെ തൊഴിൽ മേളയുടെ സ്വഭാവത്തെയും പലരും വിമർശിച്ചു. നിരവധി പേരെ പിന്തിരിപ്പിക്കേണ്ടി വന്നതിനാൽ പരിപാടിയിൽ പങ്കെടുക്കാൻ ദീർഘദൂരം താണ്ടി വന്ന പലരും പ്രകോപിതരായതായും റിപ്പോർട്ടുകൾ പറഞ്ഞു.
2022 സെപ്റ്റംബർ 16 മുതൽ ഡിവിഷനുകളിലുടനീളമുള്ള വിവിധ തസ്തികകളിലേക്ക് ഇന്ത്യൻ താമസക്കാരിൽ നിന്ന് അപേക്ഷ സ്വീകരിക്കാൻ തുടങ്ങിയതായി ഖത്തർ എയർവേയ്‌സ് ഗ്രൂപ്പ് പ്രസ്താവനയിൽ അറിയിച്ചു.
പാചകം, കോർപ്പറേറ്റ്, വാണിജ്യം, മാനേജ്മെന്റ്, കാർഗോ, ഉപഭോക്തൃ സേവനം, എഞ്ചിനീയറിംഗ്, ഫ്ലൈറ്റ് ഓപ്പറേഷൻസ്, ഗ്രൗണ്ട് സർവീസ്, സേഫ്റ്റി ആൻഡ് സെക്യൂരിറ്റി, ഡിജിറ്റൽ, അഡ്മിനിസ്ട്രേഷൻ തുടങ്ങി വൈവിധ്യമാർന്ന മേഖലകളിൽ നിരവധി പേർക്കാണ് ഗ്രൂപ്പ് അവസരമൊരുക്കിയത്.
ഇന്ത്യയിൽ, ഖത്തർ എയർവേയ്‌സ്, ഖത്തർ ഡ്യൂട്ടി ഫ്രീ, ഖത്തർ ഏവിയേഷൻ സർവീസസ്, ഖത്തർ എയർവേയ്‌സ് കാറ്ററിംഗ് കമ്പനി, ഖത്തർ ഡിസ്ട്രിബ്യൂഷൻ കമ്പനി, ദിയാഫത്തീന ഹോട്ടലുകൾ എന്നിവയുൾപ്പെടെ നിരവധി ബിസിനസുകളിലേക്കാണ് ജീവനക്കാരെ തേടിയത്.
