ഹമദ് മെഡിക്കൽ കോർപ്പറേഷൻ (HMC), പ്രൈമറി ഹെൽത്ത് കെയർ കോർപ്പറേഷൻ (PHCC) എന്നിവരുമായി ചേർന്ന് വാർഷിക ഫ്ലൂ വാക്‌സിനേഷൻ കാമ്പയിൻ നാളെ മുതൽ പൊതുജനാരോഗ്യ മന്ത്രാലയം (MoPH) ആരംഭിക്കുന്നു.
ഒക്ടോബർ 1 മുതൽ, 2024-25 ശൈത്യകാലത്തേക്കുള്ള ഫ്ലൂ വാക്‌സിൻ ഖത്തറിലെ 80-ലധികം ആരോഗ്യ കേന്ദ്രങ്ങളിൽ സൗജന്യമായി ലഭ്യമാകും. ഇതിൽ 31 പിഎച്ച്സിസി ഹെൽത്ത് സെൻ്ററുകൾ, എച്ച്എംസി ഔട്ട്പേഷ്യൻ്റ് ക്ലിനിക്കുകൾ, വിവിധ സ്വകാര്യ, അർദ്ധ സർക്കാർ ആശുപത്രികൾ എന്നിവ ഉൾപ്പെടുന്നു.
എച്ച്എംസിയിലെ സാംക്രമിക രോഗ വിഭാഗത്തെ നയിക്കുന്ന ഡോ. അബ്ദുല്ലത്തീഫ് അൽ ഖൽ, ശൈത്യകാലത്തിനു മുമ്പ് നിങ്ങളെയും കുടുംബത്തെയും സംരക്ഷിക്കാൻ നേരത്തെ തന്നെ വാക്‌സിനേഷൻ എടുക്കേണ്ടതിൻ്റെ പ്രാധാന്യം ഊന്നിപ്പറയുന്നു. ഇൻഫ്ലുവന്സ ഗുരുതരാവസ്ഥയിലേക്ക് എത്തിക്കാൻ സാധ്യതയുണ്ടെന്നും ഇൻഫ്ലുവൻസ വൈറസുകൾ ഓരോ വർഷവും മാറുന്നവയാണെന്നും അദ്ദേഹം ഓർമ്മിപ്പിക്കുന്നു, അതിനാൽ എല്ലാ ശൈത്യകാലത്തും എല്ലാവരും വാക്‌സിൻ എടുക്കണം.
രാജ്യത്തുടനീളമുള്ള നിരവധി ക്ലിനിക്കുകളിൽ വാക്‌സിൻ എളുപ്പത്തിൽ ലഭ്യമാകുന്നതിനാൽ, എത്രയും വേഗം സൗജന്യമായി ലഭിക്കുന്ന ഫ്ലൂ ഷോട്ട് എടുക്കാൻ അദ്ദേഹം എല്ലാവരെയും പ്രോത്സാഹിപ്പിക്കുന്നു.
ആറ് മാസമോ അതിൽ കൂടുതലോ പ്രായമുള്ള ആളുകൾ തങ്ങളേയും മറ്റുള്ളവരേയും സംരക്ഷിക്കാൻ വാക്‌സിനേഷൻ എടുക്കണമെന്ന് മന്ത്രാലയത്തിലെ ഹെൽത്ത് പ്രൊട്ടക്ഷൻ ഡയറക്റ്റർ ഡോ. ഹമദ് അൽ റൊമൈഹി പറഞ്ഞു. 50 വയസ്സിനു മുകളിലുള്ളവർ, വിട്ടുമാറാത്ത ആരോഗ്യപ്രശ്‌നങ്ങളുള്ളവർ, കൊച്ചുകുട്ടികൾ (ആറുമാസം മുതൽ അഞ്ചു വയസു വരെ), ഗർഭിണികൾ, ആരോഗ്യപ്രവർത്തകർ എന്നിവരുൾപ്പെടെ ചില ഗ്രൂപ്പുകൾക്ക് അപകടസാധ്യത കൂടുതലാണ്.
മഞ്ഞുകാലത്തിനു മുമ്പ് പ്രതിരോധശേഷി വർദ്ധിപ്പിക്കുന്നതിന് ഇൻഫ്ലുവൻസ വാക്‌സിൻ ഉടൻ നേടണമെന്ന് പിഎച്ച്സിസിയിലെ ഡോ. ഖാലിദ് ഹമീദ് എലവാട് സമൂഹത്തോട് അഭ്യർത്ഥിച്ചു. വാക്‌സിൻ പരമാവധി സംരക്ഷണം നൽകാൻ രണ്ടാഴ്ച്ച വരെ എടുക്കും, അതിനാൽ എത്രയും വേഗം വാക്‌സിനേഷൻ എടുക്കുന്നുവോ അത്രയും നല്ലതാണെന്ന് അദ്ദേഹം വിശദീകരിച്ചു.
നിർജ്ജീവമായ വൈറസ് അടങ്ങിയിരിക്കുന്നതിനാൽ വാക്‌സിൻ നിന്ന് നിങ്ങൾക്ക് ഇൻഫ്ലുവൻസ പകരില്ലെന്ന് ഡോക്ടർ എലവാഡ് അറിയിച്ചു. ഫ്ലൂ വാക്സിനുകൾ സുരക്ഷിതമാണെന്നും കഴിഞ്ഞ 50 വർഷമായി ലോകമെമ്പാടുമുള്ള ദശലക്ഷക്കണക്കിന് ആളുകൾ ഇത് ഉപയോഗിച്ചിട്ടുണ്ടെന്നും അദ്ദേഹം എടുത്തുപറഞ്ഞു.
