ഈദ് ദിവസങ്ങൾ സുഗമമായി കൈകാര്യം ചെയ്‌ത്‌ എച്ച്എംസി; കഴിഞ്ഞ വർഷത്തെ അപേക്ഷിച്ച് രോഗികളുടെ എണ്ണത്തിൽ കുറവ്
ഈദ് അൽ-അദ്ഹയുടെ ആദ്യ ദിവസം ഹമദ് ജനറൽ ആശുപത്രിയിലെ ഹമദ് മെഡിക്കൽ കോർപ്പറേഷന്റെ (എച്ച്എംസി) പ്രധാന എമർജൻസി വിഭാഗത്തിൽ 799 രോഗികളെയാണ് പ്രവേശിപ്പിച്ചതെന്നും മുൻവർഷങ്ങളെ അപേക്ഷിച്ച് രോഗികളുടെ എണ്ണം കുറവായിരുന്നുവെന്നും മെഡിക്കൽ സ്റ്റാഫ് പറഞ്ഞു.
എല്ലാ അടിയന്തര സേവനങ്ങളിലും ആവശ്യത്തിന് ജീവനക്കാരുണ്ടെന്നും എല്ലാ കേസുകളും സുഗമമായി കൈകാര്യം ചെയ്‌തതായും അത്യാഹിത വിഭാഗത്തിലെ റസിഡന്റ് ഡോക്ടറായ ഡോ. ആയിഷ അൽ-സാദ പറഞ്ഞു. “ഈദ് അവധിക്കാലത്ത് സാധാരണയേക്കാൾ കേസുകൾ കുറവായിരുന്നു, കൂടാതെ എത്തുന്നവർക്കുള്ള ശാരീരികപ്രശ്‌നങ്ങൾ കഴിഞ്ഞ വർഷങ്ങളിലേതിനു സമാനമാണ്,” അവർ പറഞ്ഞു.
799 രോഗികളിൽ 53% പുരുഷന്മാരായിരുന്നു. അവരിൽ ഭൂരിഭാഗവും 15-നും 30-നും ഇടയിൽ പ്രായമുള്ളവരായിരുന്നു – 212 പേർ. ഏറ്റവും സാധാരണമായ അസുഖങ്ങൾ വയറിലെ അസ്വസ്ഥത (120 കേസുകൾ) ആയിരുന്നു, തുടർന്ന് റോഡപകടങ്ങൾ (16), ഓക്കാനം അല്ലെങ്കിൽ ഛർദ്ദി (13 കേസുകൾ) എന്നിവയായിരുന്നു.
എച്ച്എംസിയുടെ പീഡിയാട്രിക് എമർജൻസി സെന്ററുകൾ (പിഇസി) 1,664 കുട്ടികളെ ചികിത്സിച്ചു. ഈ എണ്ണം സാധാരണമാണെന്നും ദൈനംദിന പ്രവർത്തനങ്ങളുടെ ഭാഗമാണെന്നും പീഡിയാട്രിക്സ് മേധാവി ഡോ. മുഹമ്മദ് അൽ അമ്രി പറഞ്ഞു. അൽ വക്ര എമർജൻസി ഡിപ്പാർട്ട്‌മെന്റിൽ ആകെ അഡ്‌മിറ്റ്‌ ചെയ്‌തത്‌ ആസ്ത്മ ബാധിച്ച ഒരു കുട്ടിയെയാണ്.
ആകെ 76 രോഗികൾ നിരീക്ഷണത്തിൽ കഴിയേണ്ടിവന്നു. ഇതിൽ ഭൂരിഭാഗവും (47 കേസുകൾ) അൽ സദ്ദ് എമർജൻസി ഡിപ്പാർട്ട്‌മെന്റിലായിരുന്നു. ബാക്കിയുള്ളവർ അൽ സാദ്, അൽ റയ്യാൻ, അൽ ദായെൻ, അൽ ഷമാൽ എന്നിവിടങ്ങളിലെ പിഇസികളിൽ നിന്നുള്ളവരായിരുന്നു.
നാഷണൽ കെയർ ആൻഡ് റിസർച്ച് സെന്റർ 11 രോഗികളെ അഡ്‌മിറ്റ്‌ ചെയ്‌തു, അൽ വക്ര എമർജൻസി ഡിപ്പാർട്ട്‌മെന്റ് മൂന്ന് പേരെയും അഡ്‌മിറ്റാക്കി.
ആംബുലൻസ് സർവീസിന് അന്ന് 799 കോളുകൾ ലഭിച്ചു. ഇതിൽ 541 എണ്ണം അടിയന്തരവും 258 എണ്ണം അടിയന്തരമല്ലാത്തവയുമായിരുന്നു. ഇരുപത്തിയൊന്ന് കോളുകൾ റോഡപകടങ്ങൾ അറിയിക്കാനായിരുന്നു, മൂന്ന് രോഗികളെ എയർ ആംബുലൻസാണ് എടുത്തത്.
ഖത്തറിലെ വാർത്തകളും വിവരങ്ങളും തത്സമയം ലഭിക്കാൻ -വാട്ട്സ്ആപ്പ് ഗ്രൂപ്പ് 👇https://chat.whatsapp.com/EXau0c7bVzpANryExd3Apv
