മെഡിക്കൽ വിദ്യാഭ്യാസ രംഗത്ത് പുതിയ ചുവടുവെപ്പ്; രാജ്യത്താദ്യമായി ഫിസിക്കൽ മെഡിസിൻ ആൻഡ് റീഹാബിലിറ്റേഷൻ റെസിഡൻസി പ്രോഗ്രാം ആരംഭിച്ചു

ഹമദ് മെഡിക്കൽ കോർപ്പറേഷനിലെ (എച്ച്എംസി) ഖത്തർ റീഹാബിലിറ്റേഷൻ ഇൻസ്റ്റിറ്റ്യൂട്ട് (ക്യുആർഐ) ഖത്തറിലെ ആദ്യത്തെ ഫിസിക്കൽ മെഡിസിൻ ആൻഡ് റീഹാബിലിറ്റേഷൻ (പിഎം & ആർ) റെസിഡൻസി പ്രോഗ്രാം ഔദ്യോഗികമായി ആരംഭിച്ചു. നാല് വർഷം നീണ്ടുനിൽക്കുന്ന ഈ പരിശീലന പരിപാടി അടുത്ത അധ്യയന വർഷത്തിൽ ആരംഭിക്കും. ഇത് രാജ്യത്തെ മെഡിക്കൽ വിദ്യാഭ്യാസവും റീഹാബിലിറ്റേഷൻ സേവനങ്ങളും മെച്ചപ്പെടുത്താൻ ലക്ഷ്യമിടുന്നു.

അന്താരാഷ്ട്ര മാനദണ്ഡങ്ങൾ പാലിച്ച്‌ നടത്തുന്ന ഈ പരിപാടി ഫിസിയാട്രിസ്റ്റുകൾ എന്ന പേരിൽ അറിയപ്പെടുന്ന ഭാവിയിലെ ഡോക്റ്റർമാരെ അഡ്വാൻസ്ഡ് റീഹാബിലിറ്റേഷൻ കെയർ പരിശീലിപ്പിക്കാൻ സഹായിക്കും. വെർച്വൽ റിയാലിറ്റി തെറാപ്പി, ഗെയ്റ്റ് അനാലിസിസ്, ന്യൂറോമോഡുലേഷൻ, സ്പാസ്റ്റിസിറ്റി ട്രീറ്റ്‌മെന്റ് തുടങ്ങിയ ഏറ്റവും പുതിയ സാങ്കേതികവിദ്യകളിലുള്ള പരിശീലനം ഇതിൽ ഉൾപ്പെടുന്നു.

ഖത്തറിന് ഇത് അഭിമാനകരമായ നിമിഷമാണെന്ന് ക്യുആർഐ സിഇഒയും മെഡിക്കൽ ഡയറക്ടറുമായ ഡോ. ഹനാദി അൽ ഹമദ് പറഞ്ഞു. ഈ പരിപാടി ഖത്തറിന്റെ ദേശീയ ആരോഗ്യ തന്ത്രം 2024–2030-ന്റെ ഭാഗമാണെന്നും ലോകാരോഗ്യ സംഘടനയുടെ റീഹാബിലിറ്റേഷൻ 2030 പദ്ധതിയുടെ ലക്ഷ്യങ്ങളെ പിന്തുണയ്ക്കുന്നുവെന്നും അവർ വിശദീകരിച്ചു. ഖത്തറിലെ പുനരധിവാസ സേവനങ്ങളുടെ ഭാവി രൂപപ്പെടുത്താൻ ഈ പരിപാടി സഹായിക്കുമെന്നും അവർ കൂട്ടിച്ചേർത്തു.

ഹെൽത്ത് കെയർ എഡ്യുക്കേഷനിൽ ഒരു നേതാവാകുക, ശക്തമായ പ്രാദേശിക മെഡിക്കൽ വർക്ക് ഫോഴ്‌സ് കെട്ടിപ്പടുക്കുക എന്നിങ്ങനെയുള്ള ഖത്തറിന്റെ ലക്ഷ്യങ്ങളെ ഈ പരിപാടി പിന്തുണയ്ക്കുന്നുവെന്ന് എച്ച്എംസിയുടെ മെഡിക്കൽ വിദ്യാഭ്യാസ വിഭാഗത്തിൽ നിന്നുള്ള ഡോ. അബ്ദുള്ള റാഷിദ് അൽ നഈമി പറഞ്ഞു.

ഖത്തരി മെഡിക്കൽ ബിരുദധാരികൾക്ക് രാജ്യം വിടാതെ തന്നെ ഈ മേഖലയിൽ വൈദഗ്ദ്ധ്യം നേടാനുള്ള വഴി ഇതിലൂടെ വാഗ്ദാനം ചെയ്യുന്നുവെന്ന് പരിപാടിയുടെ രൂപീകരണത്തിന് നേതൃത്വം നൽകിയ ഡോ. ഫാത്മ ജാസിം അൽ-കുവാരി പറഞ്ഞു. ശക്തവും സ്വാശ്രയവുമായ ഒരു ആരോഗ്യ സംരക്ഷണ സംവിധാനം കെട്ടിപ്പടുക്കാൻ ഈ പരിപാടി സഹായിക്കുമെന്ന് അവർ പറഞ്ഞു.

ഖത്തറിലെ വാർത്തകളും വിവരങ്ങളും തത്സമയം ലഭിക്കാൻ -വാട്ട്സ്ആപ്പ് ഗ്രൂപ്പ് 👇https://chat.whatsapp.com/LHsDNvsaDtU8kIXlVBkdon