ദോഹ: അന്താരാഷ്ട്ര എയർ ട്രാൻസ്‌പോർട്ട് റേറ്റിംഗ് ഓർഗനൈസേഷനായ സ്‌കൈട്രാക്‌സ് അഭൂതപൂർവമായ ഏഴാം തവണയും ഖത്തർ എയർവേയ്‌സിനെ “എയർലൈൻ ഓഫ് ദ ഇയർ” ആയി തിരഞ്ഞെടുത്തു. 2022-ൽ കമ്പനി അതിന്റെ 25-ാം വാർഷികം ആഘോഷിക്കുമ്പോളാണ് അത്യപൂർവ നേട്ടം.
ഇന്ന് ലണ്ടനിൽ നടന്ന പരിപാടിയിൽ, ലോകത്തിലെ ഏറ്റവും മികച്ച ബിസിനസ് ക്ലാസ്, ലോകത്തിലെ ഏറ്റവും മികച്ച ബിസിനസ് ക്ലാസ് ലോഞ്ച് ഡൈനിംഗ്, മിഡിൽ ഈസ്റ്റിലെ മികച്ച എയർലൈൻ എന്നിവയുൾപ്പെടെ മൂന്ന് അധിക അവാർഡുകളും എയർലൈൻ സ്വന്തമാക്കി.
2011, 2012, 2015, 2017, 2019, 2021, ഇപ്പോൾ 2022 വർഷങ്ങളിൽ ‘എയർലൈൻ ഓഫ് ദ ഇയർ’ ആയി ഖത്തർ എയർവേയ്‌സ് തിരഞ്ഞെടുക്കപ്പെട്ടു.
ഖത്തർ എയർവേയ്‌സിന്റെ ഹോം എയർപോർട്ടും ഹബ്ബുമായ ഹമദ് ഇന്റർനാഷണൽ എയർപോർട്ട് ഈയിടെ തുടർച്ചയായി രണ്ടാം വർഷവും ലോകത്തിലെ ഏറ്റവും മികച്ച എയർപോർട്ട് ആയി തിരഞ്ഞെടുക്കപ്പെട്ടിരുന്നു.
പേറ്റന്റ് നേടിയ ക്യുസ്യൂട്ട് ഫീച്ചർ ചെയ്യുന്ന എയർലൈനിന്റെ പ്രീമിയം ക്യാബിൻ ആറാം വർഷവും ലോകത്തിലെ ഏറ്റവും മികച്ച ബിസിനസ് ക്ലാസായി തിരഞ്ഞെടുക്കപ്പെട്ടു. അതേസമയം അൽ മൗർജാൻ ലോഞ്ച് അതിന്റെ മികച്ച പാചക മികവിന് അംഗീകരിക്കപ്പെടുകയും ലോകത്തിലെ ഏറ്റവും മികച്ച ബിസിനസ് ക്ലാസ് ലോഞ്ച് ഡൈനിംഗ് അവാർഡ് നേടുകയും ചെയ്തു.
മിഡിൽ ഈസ്റ്റിലെ മികച്ച എയർലൈനായും ഖത്തർ എയർവേയ്‌സിനെ പ്രഖ്യാപിച്ചു.
“ഏവിയേഷൻ ഇൻഡസ്ട്രിയുടെ ഓസ്കർ” എന്ന് പരക്കെ അറിയപ്പെടുന്ന അവാർഡുകൾ, 2021 സെപ്റ്റംബർ മുതൽ 2022 ഓഗസ്റ്റ് വരെയുള്ള 12 മാസങ്ങളിൽ 14 ദശലക്ഷത്തിലധികം യോഗ്യതയുള്ള എൻട്രികളിൽ നിന്നാണ് തിരഞ്ഞെടുത്തത്. ഇക്കാലയളവിൽ ഖത്തർ എയർവേയ്‌സ് അതിന്റെ ആഗോള നെറ്റ്‌വർക്ക് 150 ലക്ഷ്യസ്ഥാനങ്ങളിലേക്ക് ഉയർത്തിയിരുന്നു.
2021 ജനുവരിയിൽ സ്‌കൈട്രാക്‌സ് കോവിഡ്-19 സുരക്ഷാ റേറ്റിംഗ് ലഭിച്ച ആദ്യത്തെ ആഗോള എയർലൈനും ഖത്തർ എയർവേയ്‌സ് ആയിരുന്നു.
ആഗോളതലത്തിലുള്ള ഉപഭോക്തൃ സംതൃപ്തി പഠനം നൽകുന്നതിനായി 1999-ൽ ആരംഭിച്ച സ്‌കൈട്രാക്‌സ് വേൾഡ് എയർലൈൻ അവാർഡുകൾ സ്വതന്ത്രവും നിഷ്‌പക്ഷവുമാണ്. ലോകമെമ്പാടുമുള്ള യാത്രക്കാർ ഏറ്റവും വലിയ എയർലൈൻ പാസഞ്ചർ സർവേയിൽ വോട്ട് ചെയ്താണ് അവാർഡ് ജേതാക്കളെ തീരുമാനിക്കുന്നത്.
