ജിസിസി രാജ്യങ്ങളെ ബന്ധിപ്പിക്കുന്ന റെയിൽവേ പ്രോജക്റ്റ് 2030-ൽ പൂർത്തിയാക്കുമെന്ന് ഖത്തർ ഗതാഗത മന്ത്രി

ഇന്നലെ ഖത്തറിൽ നടന്ന ജിസിസി ഗതാഗത മന്ത്രിമാരുടെ 26-ാമത് യോഗത്തിൽ ഖത്തർ ഗതാഗത മന്ത്രി ജാസിം സെയ്ഫ് അഹമ്മദ് അൽ സുലൈത്തി അധ്യക്ഷത വഹിച്ചു, എല്ലാ ജിസിസി രാജ്യങ്ങളിലെ ഗതാഗത മന്ത്രിമാരും ജിസിസി സെക്രട്ടറി ജനറൽ ജാസെം മുഹമ്മദ് അൽബുദൈവിയും യോഗത്തിൽ പങ്കെടുത്തിരുന്നു.

അൽ സുലൈത്തി തൻ്റെ പ്രസംഗത്തിൽ ജിസിസി റെയിൽവേ പ്രോജക്റ്റ് പ്രധാനപ്പെട്ട മുൻഗണനയാണെന്നും മേഖലയുടെ വികസന പദ്ധതികളുടെ സുപ്രധാന ഭാഗവുമാണെന്നും എടുത്തു പറഞ്ഞു. ആധുനിക റെയിൽവേ ശൃംഖലയിലൂടെ ജിസിസി രാജ്യങ്ങളെ ബന്ധിപ്പിക്കുകയാണ് പദ്ധതി ലക്ഷ്യമിടുന്നതെന്നും ഇത് വ്യാപാരം, ലോജിസ്റ്റിക്‌സ്, ഗതാഗതം എന്നിവയിൽ ഗുണപരമായ സ്വാധീനം ചെലുത്തുമെന്നും അദ്ദേഹം പറഞ്ഞു.

റെയിൽ ശൃംഖല ജിസിസി രാജ്യങ്ങളിലുടനീളമുള്ള വ്യാപാര പ്രവാഹം സുഗമമാക്കുകയും ചരക്കുകളുടെ നീക്കം വർദ്ധിപ്പിക്കുകയും ലോജിസ്റ്റിക് കേന്ദ്രങ്ങളെയും വ്യവസായ മേഖലകളെയും പ്രധാന തുറമുഖങ്ങളുമായി ബന്ധിപ്പിക്കുകയും അവയുടെ സാമ്പത്തികമായ പ്രാധാന്യം ശക്തിപ്പെടുത്തുകയും ചെയ്യുമെന്ന് പ്രതീക്ഷിക്കുന്നു. ഈ കണക്ഷൻ ഏഷ്യ, യൂറോപ്പ് തുടങ്ങിയ പ്രദേശങ്ങളുമായുള്ള വ്യാപാരം വർധിപ്പിക്കാനും ജിസിസിക്കുള്ളിലെ ഗതാഗതം വേഗത്തിലാക്കാനും സുരക്ഷിതമാക്കാനും സഹായിക്കും.

ജിസിസി റെയിൽവേ പദ്ധതി നന്നായി പുരോഗമിക്കുന്നുണ്ടെന്നും 2030-ഓടെ അത് പ്രവർത്തനക്ഷമമാക്കാൻ എല്ലാ രാജ്യങ്ങളും ഒന്നിച്ച് പ്രവർത്തിക്കുന്നുണ്ടെന്നും അൽ സുലൈത്തി ചൂണ്ടിക്കാട്ടി. മേഖലയിലെ സാമ്പത്തിക ഏകീകരണം, വ്യാപാര കാര്യക്ഷമത വർദ്ധിപ്പിക്കൽ, ദശലക്ഷക്കണക്കിന് ആളുകളെ ബന്ധിപ്പിക്കുന്ന സുസ്ഥിര ഗതാഗത സൗകര്യം എന്നിവ നൽകുന്നതിന് പദ്ധതി അനിവാര്യമാണെന്ന് കരുതുന്നു.

യോഗത്തിൽ റെയിൽവേ പദ്ധതിയുമായി ബന്ധപ്പെട്ട് ജിസിസി മന്ത്രിമാർ നിരവധി തീരുമാനങ്ങൾ എടുത്തു. ജിസിസി റെയിൽവേ അതോറിറ്റിയെക്കുറിച്ചുള്ള അപ്‌ഡേറ്റുകളും ഈ റെയിൽവേ വഴി ജിസിസി രാജ്യങ്ങളെ ബന്ധിപ്പിക്കുന്നതിനുള്ള പൊതു കരാറും ഇതിൽ ഉൾപ്പെടുന്നു. ജിസിസിക്കുള്ളിലെ കര, കടൽ ഗതാഗതം നിയന്ത്രിക്കുന്ന നിയമങ്ങൾക്കൊപ്പം ഏകീകൃത ഗതാഗത സംവിധാനം ഉറപ്പാക്കുന്നതിനുള്ള എക്സിക്യൂട്ടീവ് ചട്ടങ്ങളും മന്ത്രിമാർ ചർച്ച ചെയ്‌തു