വാരാന്ത്യത്തിൽ ശക്തമായ കാറ്റിനും ഇടിമിന്നലോടു കൂടിയ മഴയ്ക്കും സാധ്യതയുണ്ടെന്ന് ഖത്തർ കാലാവസ്ഥാ വകുപ്പ്

ഖത്തർ കാലാവസ്ഥാ വകുപ്പ് ഇന്നലെ നടത്തിയ കാലാവസ്ഥാ പ്രവചനത്തിൽ വാരാന്ത്യത്തിൽ ശക്തമായ കാറ്റിനും കടൽക്ഷോഭത്തിനും ഇടിമിന്നലോടു കൂടിയ മഴക്കും സാധ്യതയുണ്ടെന്ന് വ്യക്തമാക്കുന്നു.

അൽ ഖോർ, അൽ ധാക്കിറ എന്നിവയുൾപ്പെടെ വിവിധ പ്രദേശങ്ങളിൽ നിന്നുള്ള മഴയുടെ വീഡിയോകൾ അവർ പങ്കുവെക്കുകയും രാജ്യത്തിൻ്റെ വടക്കൻ ഭാഗങ്ങളിൽ ഇടിമിന്നലുണ്ടെന്ന് കാണിക്കുന്ന റഡാർ ചിത്രങ്ങൾ പോസ്റ്റ് ചെയ്യുകയും ചെയ്തു.

ചിതറിക്കിടക്കുന്ന മേഘങ്ങളും മഴയും പ്രതീക്ഷിക്കുന്നുണ്ടെങ്കിലും അടുത്ത മൂന്ന് ദിവസങ്ങളിൽ താപനില 27 ഡിഗ്രി സെൽഷ്യസിനും 35 ഡിഗ്രി സെൽഷ്യസിനും ഇടയിൽ തുടരും.

ശനിയാഴ്‌ച ശക്തമായ കാറ്റും പ്രക്ഷുബ്ധമായ കടലും ഉണ്ടാകുമെന്ന് അവർ മുന്നറിയിപ്പ് നൽകുന്നു, പകൽ ചൂടുള്ള കാലാവസ്ഥയും രാത്രി താപനിലയിൽ കുറവുമായിരിക്കും.

ഇന്ന്, കാറ്റ് 8-18 നോട്ട് വേഗതയിൽ വടക്ക് പടിഞ്ഞാറ് നിന്ന് വടക്ക് കിഴക്കോട്ടായിരിക്കും. ഇടിമിന്നലും മഴയുമുള്ള സമയത്ത് 26 നോട്ട് വരെ വേഗതയിലായേക്കും. ശനിയാഴ്‌ച, 8-18 നോട്ട് വേഗതയിലുള്ള സ്ഥിരമായ വടക്കുപടിഞ്ഞാറൻ കാറ്റായിരിക്കും.

കടലിലെ തിരമാലകൾ വെള്ളി, ശനി ദിവസങ്ങളിൽ 4-7 അടി ഉയരത്തിലായിരിക്കും, ചിലപ്പോൾ ഒൻപത് അടിവരെ ഉയരാനും സാധ്യതയുണ്ട്.