മിഡിൽ ഈസ്റ്റ്/നോർത്ത് ആഫ്രിക്ക മേഖലയിൽ ഏറ്റവും ഇക്കണോമിക് ഫ്രീഡമുള്ള മൂന്നാമത്തെ രാജ്യമായി ഖത്തർ

ദി ഹെറിറ്റേജ് ഫൗണ്ടേഷൻ്റെ 2024-ലെ ഇക്കണോമിക് ഫ്രീഡം ഇൻഡക്‌സ് പ്രകാരം, മിഡിൽ ഈസ്റ്റ്/നോർത്ത് ആഫ്രിക്ക മേഖലയിൽ ഏറ്റവും ഇക്കണോമിക് ഫ്രീഡമുള്ള മൂന്നാമത്തെ രാജ്യമാണ് ഖത്തർ, കൂടാതെ 184 രാജ്യങ്ങളിൽ ആഗോളതലത്തിൽ 28ആം സ്ഥാനത്തുമാണ്. കഴിഞ്ഞ വർഷത്തെ അപേക്ഷിച്ച് ഖത്തറിന്റെ സ്‌കോർ 0.2 പോയിൻ്റ് മെച്ചപ്പെട്ടു, ഖത്തറിൻ്റെ ഇക്കണോമിക് ഫ്രീഡം സ്കോർ ലോകത്തിനും പ്രാദേശിക ശരാശരിക്കും മുകളിലാണ്.

സിംഗപ്പൂർ (83.5), സ്വിറ്റ്‌സർലൻഡ് (83), അയർലൻഡ് (82.6), തായ്‌വാൻ (80) എന്നിവയാണ് സൂചികയിലെ ആദ്യ നാല് രാജ്യങ്ങൾ. ഗൾഫ് സഹകരണ കൗൺസിൽ (ജിസിസി) രാജ്യങ്ങളിൽ, യുണൈറ്റഡ് അറബ് എമിറേറ്റ്സിനു പിന്നിലാണ് ഖത്തർ രണ്ടാം സ്ഥാനത്ത് നിൽക്കുന്നത്. യുഎഇ 71.1 സ്കോറുമായി ആഗോളതലത്തിൽ 22ആം സ്ഥാനത്താണ്. ബഹ്‌റൈൻ 54 (63.4), ഒമാൻ 56 (62.9), സൗദി അറേബ്യ 69 (61.9), കുവൈറ്റ് 90 (58.5) എന്നീ സ്ഥാനങ്ങളിൽ നിൽക്കുന്നു.

യുണൈറ്റഡ് കിങ്‌ഡം (30, 68.6), ജപ്പാൻ (38, 67.5), സ്പെയിൻ (55, 63.3), ഫ്രാൻസ് (62, 62.5) എന്നിവയുൾപ്പെടെ നിരവധി വികസിത രാജ്യങ്ങളെ അപേക്ഷിച്ച് ഖത്തറിൻ്റെ സ്കോർ ഉയർന്നതാണ്. സംരംഭകത്വം മെച്ചപ്പെടുത്തുന്നതിനും സമ്പദ്‌വ്യവസ്ഥയെ വൈവിധ്യവത്കരിക്കുന്നതിനുമുള്ള ശ്രമങ്ങൾ ഉയർത്തിക്കാട്ടിക്കൊണ്ട് ഖത്തറിൻ്റെ സമ്പദ്‌വ്യവസ്ഥയെ “മിതമായി സ്വതന്ത്രമായത്” എന്ന് റിപ്പോർട്ട് വിശേഷിപ്പിക്കുന്നു. രാജ്യത്തിൻ്റെ തുറന്ന വ്യാപാര നയങ്ങൾ സ്വകാര്യമേഖലയുടെ വളർച്ചയെ പ്രോത്സാഹിപ്പിച്ചു.

ബിസിനസ് തുടങ്ങുന്നതും ലൈസൻസ് നേടുന്നതും ഖത്തറിൽ എളുപ്പമായി. തൊഴിൽ സേനയിൽ ഭൂരിഭാഗവും പ്രവാസി തൊഴിലാളികളാണ്, ഇമിഗ്രേഷൻ നിയമങ്ങൾ രാജ്യത്ത് കർശനമായി നിയന്ത്രിക്കപ്പെടുന്നു.

ലോക ശരാശരി 58.6 ഉം പ്രാദേശിക ശരാശരി 57.4 ഉം ആയിരിക്കുമ്പോൾ ഖത്തറിൻ്റെ ഇക്കണോമിക് ഫ്രീഡം ശരാശരി 68.8 ആണ്. ഖത്തർ പൊതുവെ നിയമവാഴ്‌ചയെ മാനിക്കുന്നുവെന്നും സ്വത്തവകാശവും സർക്കാരിൻ്റെ സമഗ്രതയും ലോക ശരാശരിയേക്കാൾ കൂടുതലാണെന്നും റിപ്പോർട്ട് സൂചിപ്പിക്കുന്നു. ശ്രദ്ധേയമായി, ഖത്തറിലെ ഏറ്റവും ഉയർന്ന വ്യക്തിഗത, കോർപ്പറേറ്റ് നികുതി നിരക്കുകൾ 0 ശതമാനമാണ്, നികുതി ഭാരം ജിഡിപിയുടെ 5.7 ശതമാനമാണ്. ഗവൺമെൻ്റ് ചെലവ് ജിഡിപിയുടെ 29.4 ശതമാനവും പൊതുകടം ജിഡിപിയുടെ 42.4 ശതമാനവുമാണ്.