ഉപഭോക്താക്കൾക്ക് ഇലക്ട്രോണിക് പേയ്‌മെൻ്റ് സേവനങ്ങൾ ലഭ്യമാക്കാത്ത വാണിജ്യ ഔട്ട്‌ലെറ്റുകൾ താൽക്കാലികമായി അടച്ചുപൂട്ടൽ ഉൾപ്പെടെയുള്ള നടപടികൾ നേരിടേണ്ടി വരുമെന്ന് വാണിജ്യ വ്യവസായ മന്ത്രാലയത്തിലെ ഒരു ഉന്നത ഉദ്യോഗസ്ഥൻ വ്യക്തമാക്കി.
എല്ലാ വാണിജ്യ ഔട്ട്‌ലെറ്റുകളിലും അധിക ചാർജുകളൊന്നും കൂടാതെ ഉപഭോക്താക്കൾക്ക് ഇലക്ട്രോണിക് പേയ്‌മെൻ്റ് ഓപ്ഷൻ നൽകണമെന്ന് വാണിജ്യ, വ്യവസായ മന്ത്രാലയം (MoCI) നിർബന്ധമാക്കിയിട്ടുണ്ട്.
ഇലക്ട്രോണിക് പേയ്‌മെൻ്റ് സേവനം നൽകാത്തതിനുള്ള ശിക്ഷ 14 ദിവസത്തേക്ക് വാണിജ്യ ഔട്ട്‌ലെറ്റുകൾ അടച്ചിടൽ ആണെന്ന് രജിസ്‌ട്രേഷൻ ആൻഡ് ലൈസൻസിംഗ് ഡിപ്പാർട്ട്‌മെൻ്റിലെ ഇൻസ്പെക്ഷൻ വിഭാഗം മേധാവി സെയ്ഫ് അൽ അത്ബ പറഞ്ഞു. നിയമലംഘനം മാറ്റുന്നത് വരെ അഡ്മിനിസ്ട്രേറ്റീവ് ക്ലോഷർ പുതുക്കുകയും ചെയ്യുമെന്ന് അദ്ദേഹം ഖത്തർ ടിവിയോട് പറഞ്ഞു.
‘കുറവ് പണം കൂടുതൽ സുരക്ഷ’ എന്ന ആശയം പിന്തുടർന്ന്, എല്ലാ വാണിജ്യ ഔട്ട്‌ലെറ്റുകളിലും മൂന്ന് തരം ഇലക്ട്രോണിക് പേയ്‌മെൻ്റ് സേവനങ്ങളിൽ ഒന്ന് ഉപഭോക്താക്കൾക്ക് നൽകുന്നത് നിർബന്ധമാക്കിയിട്ടുണ്ട്. ബാങ്ക് കാർഡ്, ബാങ്ക് പേയ്‌മെൻ്റ് വാലറ്റ് അല്ലെങ്കിൽ ക്യുആർ കോഡ് എന്നിവയാണ് അവ.
പണമിടപാടിന് ബാങ്കിൽ നിന്ന് പിൻവലിക്കൽ, മറ്റ് ബാങ്കുകളിലേക്ക് പണം കൊണ്ടുപോകൽ തുടങ്ങിയ ദൈർഘ്യമേറിയ നടപടിക്രമങ്ങൾ ആവശ്യമാണ്. ഇ-പെയ്‌മെന്റുകൾ ഇത് എളുപ്പമാക്കുന്നു. ഇലക്ട്രോണിക് പേയ്‌മെൻ്റുകൾ കള്ളപ്പണത്തിൻ്റെ അപകടസാധ്യത കുറയ്ക്കാനും സഹായിക്കുന്നു.
ബാങ്ക് കാർഡുകൾ മുഖേന പേയ്‌മെൻ്റ് സേവനങ്ങൾ വാഗ്ദാനം ചെയ്യുന്ന എല്ലാ വാണിജ്യ ഔട്ട്‌ലെറ്റുകൾക്കും കാർഡുകളുടെ ഉപയോഗത്തിന് അധിക നിരക്കുകളൊന്നും ചുമത്തരുതെന്ന് ആവശ്യപ്പെട്ട് MoCI ഇതിനകം സർക്കുലർ നൽകിയിരുന്നു.
ഡിജിറ്റൽ പണമിടപാടുകൾക്ക് വിവിധ തരങ്ങളും രീതികളും ഉണ്ട്. ഡെബിറ്റ്/ക്രെഡിറ്റ് കാർഡുകൾ, ഇൻ്റർനെറ്റ് ബാങ്കിംഗ്, മൊബൈൽ വാലറ്റുകൾ, ഡിജിറ്റൽ പേയ്‌മെൻ്റ് ആപ്പുകൾ, ഏകീകൃത പേയ്‌മെൻ്റ് ഇൻ്റർഫേസ്, അൺസ്ട്രക്ചേഡ് സപ്പ്ലിമെന്ററി സർവീസ് ഡാറ്റ (യുഎസ്എസ്ഡി), ബാങ്ക് പ്രീപെയ്ഡ് കാർഡുകൾ, മൊബൈൽ ബാങ്കിംഗ് തുടങ്ങിയവയുടെ ഉപയോഗം ഇവയിൽ ചിലതാണ്.
🇶🇦 ഖത്തറിലെ വാർത്തകളും വിവരങ്ങളും തത്സമയം ലഭിക്കാൻ -വാട്ട്സ്ആപ്പ് ഗ്രൂപ്പ്👇https://chat.whatsapp.com/KzKal0sXKHF3P2dagEwpi5
