അൽ വക്ര പബ്ലിക്ക് പാർക്ക് ഉൾപ്പെടെ ഖത്തറിൽ മൂന്നു പുതിയ പാർക്കുകൾ തുറന്ന് മുനിസിപ്പാലിറ്റി മന്ത്രാലയം

മുനിസിപ്പാലിറ്റി മന്ത്രാലയവും പൊതുമരാമത്ത് അതോറിറ്റിയും ചേർന്ന് ഇന്നലെ മൂന്ന് പുതിയ പാർക്കുകൾ ഖത്തറിൽ തുറന്നു. അൽ വക്ര പബ്ലിക് പാർക്ക്, അൽ മഷാഫ് പാർക്ക്, റൗദത്ത് എഗ്ദൈം പാർക്ക് എന്നിവയാണ് തുറന്നത്.

മുനിസിപ്പാലിറ്റി മന്ത്രാലയത്തിലെ പബ്ലിക് സർവീസസ് അഫയേഴ്‌സ് അസിസ്റ്റൻ്റ് അണ്ടർസെക്രട്ടറി എൻജിനീയർ അബ്ദുല്ല അഹമ്മദ് അൽ കരാനി അൽ വക്ര പബ്ലിക് പാർക്ക് ഔദ്യോഗികമായി തുറന്നു. അൽ വക്ര മുനിസിപ്പാലിറ്റി ഡയറക്ടർ ജനറൽ ജാബർ ഹസൻ അൽ ജാബറും അൽ വക്ര മുനിസിപ്പാലിറ്റിയിലെയും അഷ്ഗലിലെയും മറ്റ് ഉദ്യോഗസ്ഥരും ചടങ്ങിൽ പങ്കെടുത്തു. അൽ വക്ര മുനിസിപ്പാലിറ്റിയിൽ സ്ഥിതി ചെയ്യുന്ന അൽ മഷാഫ് പാർക്കും മന്ത്രാലയം തുറന്നു.

അൽ റയ്യാൻ മുനിസിപ്പാലിറ്റി ഡയറക്ടർ ജനറൽ മൻസൂർ അജ്രാൻ അൽ ബുവൈനൈൻ്റെയും മറ്റ് ഉദ്യോഗസ്ഥരുടെയും സാന്നിധ്യത്തിലാണ് റൗദത്ത് എഗ്ദൈം പാർക്ക് തുറന്നത്. റൗദത്ത് എഗ്ദൈം പാർക്ക് വെറുമൊരു ഹരിത ഇടം എന്നതിനപ്പുറമാണെന്ന് അൽ ബുവൈനൈൻ പറഞ്ഞു. ജീവിതനിലവാരം മെച്ചപ്പെടുത്തുന്ന ഇത് താമസക്കാർക്ക് വിശ്രമിക്കാനും വ്യായാമം ചെയ്യാനും പ്രകൃതിയെ ആസ്വദിക്കാനും ഒരു മികച്ച സ്ഥലം വാഗ്ദാനം ചെയ്യുന്നു.

46,601 ചതുരശ്ര മീറ്റർ വിസ്‌തൃതിയിലാണ് അൽ വക്ര പബ്ലിക് പാർക്ക് സ്ഥിതി ചെയ്യുന്നത്. ഇതിൽ, 31,585 ചതുരശ്ര മീറ്റർ (62%) ഹരിത ഇടങ്ങളാണ്. അൽ മഷാഫ് പാർക്കിന് 4,741 ചതുരശ്ര മീറ്റർ വിസ്‌തീർണ്ണമുണ്ട്. 2,648 ചതുരശ്ര മീറ്റർ വിസ്‌തീർണ്ണമുള്ള ഒരു വലിയ ഹരിത ഇടവും 97 മരങ്ങളും ഇവിടെയുണ്ട്. അൽ റയ്യാൻ മുനിസിപ്പാലിറ്റിയിലെ ഒരു പ്രധാന വിനോദ കേന്ദ്രമാണ് റൗദത്ത് എഗ്ദൈം പാർക്ക്. ഇത് 24,000 ചതുരശ്ര മീറ്റർ ഉൾക്കൊള്ളുന്നു, സന്ദർശകർക്ക് വ്യത്യസ്‌ത പ്രവർത്തനങ്ങൾ ആസ്വദിക്കാൻ ധാരാളം സ്ഥലം വാഗ്ദാനം ചെയ്യുന്നു.