ഈ ബീഫ് പെപ്പറോണി പ്രോഡക്ട് വ്യക്തിഗതമായി ഇറക്കുമതി ചെയ്തവർ ഉണ്ടെങ്കിൽ നശിപ്പിക്കണമെന്ന് ആരോഗ്യ മന്ത്രാലയം

യുണൈറ്റഡ് അറബ് എമിറേറ്റ്‌സിൽ (യുഎഇ) നിന്നുള്ളതും 2025 മാർച്ച് 1 ന് കാലാവധി അവസാനിക്കുന്നതുമായ “കൺട്രി ബുച്ചർ ബോയ്” ബീഫ് പെപ്പറോണി ഉൽപ്പന്നം ഖത്തർ വിപണിയിലേക്ക് ഇറക്കുമതി ചെയ്യുന്നില്ലെന്ന് പൊതുജനാരോഗ്യ മന്ത്രാലയം (MoPH) വ്യക്തമാക്കി.

​ലിസ്റ്റീരിയ മോണോസൈറ്റോജെൻസ് ബാക്ടീരിയയുടെ സാന്നിധ്യം കണ്ടെത്തിയതിനെ തുടർന്ന് മുകളിൽ പറഞ്ഞ ഉൽപ്പന്നം തിരിച്ചുവിളിക്കുന്നതായി സൗദി ഫുഡ് ആൻഡ് ഡ്രഗ് അതോറിറ്റി മുന്നറിയിപ്പ് നൽകിയ പശ്ചാത്തലത്തിലാണ് അറിയിപ്പ്.

ഉൽപ്പന്നം വ്യക്തിപരമായി ഇറക്കുമതി ചെയ്തിട്ടുണ്ടെങ്കിൽ, അത് കഴിക്കുന്നത് ഒഴിവാക്കാനും ഉടനടി നശിപ്പിക്കാനും MoPH ഉപഭോക്താക്കളോട് അഭ്യർത്ഥിച്ചു.

ഭക്ഷ്യ അപകടസാധ്യതകളെക്കുറിച്ചുള്ള പ്രാദേശിക, അന്തർദേശീയ തലങ്ങളിലെ അറിയിപ്പുകളും വിവരങ്ങളും ഭക്ഷ്യ സുരക്ഷാ വകുപ്പ് സജീവമായി നിരീക്ഷിക്കുന്നുണ്ടെന്നും മന്ത്രാലയം കൂട്ടിച്ചേർത്തു. തുടർന്ന് ആവശ്യമായ മുൻകരുതൽ നടപടികൾക്കായി ഈ വിവരങ്ങൾ ഒരു പ്രത്യേക ഭക്ഷ്യ മാനേജ്‌മെന്റ്, റിസ്ക് അസസ്‌മെന്റ് ടീമിന് റഫർ ചെയ്യുന്നു.

ഇറക്കുമതി ചെയ്യുന്ന എല്ലാ ഭക്ഷ്യ ഉൽപ്പന്നങ്ങളും അവയുടെ സുരക്ഷ, ഗുണനിലവാരം, സാങ്കേതിക ആവശ്യകതകൾ എന്നിവ ഉറപ്പാക്കുന്നതിന് ആവശ്യമായ നിയന്ത്രണ നടപടിക്രമങ്ങൾക്ക് വിധേയമാകുന്നുണ്ടെന്ന് MoPH ആവർത്തിച്ചു.