ഖത്തറിലെ സ്വകാര്യ സ്‌കൂളുകളും കിൻ്റർഗാർട്ടനുകളും 2024-25 പുതിയ അധ്യയന വർഷത്തേക്കുള്ള തയ്യാറെടുപ്പുകൾ പൂർത്തിയാക്കുന്നു. എയർ കണ്ടീഷനിംഗ് സംവിധാനങ്ങളുടെ പ്രവർത്തനം കൃത്യമാണെന്ന് ഉറപ്പു വരുത്തുക, സുരക്ഷാ നടപടികൾ അപ്‌ഡേറ്റ് ചെയ്യുക, ലൈറ്റിംഗ് വർദ്ധിപ്പിക്കുക, ശുചീകരണവും അണുവിമുക്തമാക്കലും നടത്തുക എന്നിവ സ്‌കൂളുകളുടെ പ്രധാന പ്രവർത്തനങ്ങളിൽ ഉൾപ്പെടുന്നു.
ചില വിദ്യാഭ്യാസ സ്ഥാപനങ്ങൾ വിദ്യാർത്ഥികളെ മികച്ച രീതിയിൽ സേവിക്കുന്നതിനായി പുതിയ അധ്യാപകരെ നിയമിച്ച്, അവരുടെ വിദ്യാഭ്യാസ സംവിധാനങ്ങളും സൗകര്യങ്ങളും മെച്ചപ്പെടുത്തി ഒരുക്കങ്ങൾ നടത്തുന്നു. രാജ്യത്തുടനീളം, മൊത്തം 349 സ്വകാര്യ സ്‌കൂളുകളും കിൻ്റർഗാർട്ടനുകളും ഉണ്ട്, അവ 237,931 വിദ്യാർത്ഥികൾക്ക് സേവനം നൽകുന്നു. ഈ സ്‌കൂളുകളിൽ 20,310 അധ്യാപകരും 7,278 അഡ്‌മിനിസ്‌ട്രേറ്റിവ് സ്റ്റാഫ് അംഗങ്ങളും പ്രവർത്തിക്കുന്നു.
പുതിയ അധ്യയന വർഷം ആസന്നമാകുമ്പോൾ, അവധിക്കാലത്തു നിന്നും സ്‌കൂൾ ദിനചര്യയിലേക്ക് തിരിച്ചുപോകാൻ കുട്ടികളെ രക്ഷിതാക്കൾ കൂടി സഹായിക്കണം. പതിവ് ഷെഡ്യൂളുകൾ മെല്ലെമെല്ലെ പുനഃസ്ഥാപിച്ചുകൊണ്ട് മാതാപിതാക്കൾ ഈ പ്രക്രിയ നേരത്തെ ആരംഭിക്കണമെന്ന് വിദഗ്ദർ ശുപാർശ ചെയ്യുന്നു. ഇത് വിദ്യാർത്ഥികളെ നല്ല രീതിയിൽ തയ്യാറെടുക്കാൻ സഹായിക്കും.
അതിനു പുറമേ, ഈ സമയത്ത് ഉണ്ടാകാനിടയുള്ള ആരോഗ്യപ്രശ്‌നങ്ങളെക്കുറിച്ചും മാതാപിതാക്കൾ ജാഗ്രത പാലിക്കണം. ഭക്ഷണ ശീലങ്ങളിലെ മാറ്റങ്ങൾ, സീസണൽ അലർജികളുടെ തിരിച്ചുവരവ്, സ്‌കൂളിലേക്ക് പോകുന്നതുമായി ബന്ധപ്പെട്ട മാനസിക സമ്മർദ്ദം എന്നിവ പൊതുവായ പ്രശ്‌നങ്ങളിൽ ഉൾപ്പെടുന്നു. ഈ ആരോഗ്യ പ്രശ്‌നങ്ങൾ മുൻകൂട്ടി നിരീക്ഷിച്ച് പരിഹരിക്കുന്നത് വിദ്യാർത്ഥികൾക്ക് വലിയ രീതിയിൽ ഗുണം ചെയ്യും.
പുതിയ അധ്യയന വർഷത്തിനായി തയ്യാറെടുക്കുന്ന കുടുംബങ്ങളെ ലക്ഷ്യമിട്ട്, വിവിധ പ്രമോഷനുകളും ഡിസ്‌കൗണ്ടുകളും നൽകി, ഖത്തറിലുടനീളമുള്ള റീട്ടെയിൽ ഔട്ട്‌ലെറ്റുകൾ അവരുടെ ‘ബാക്ക്-ടു-സ്‌കൂൾ’ കാമ്പെയ്‌നുകൾ ആരംഭിച്ചിട്ടുണ്ട്. കാരിഫോർ, സെൻ്റർ പോയിൻ്റ്, ലുലു തുടങ്ങിയ മാളുകളും ഹൈപ്പർമാർക്കറ്റുകളുമെല്ലാം നേരത്തെ തന്നെ ഇത് ആരംഭിച്ചിട്ടുണ്ട്.
-
-
-
-
