വ്യോമയാന മേഖലയിലും കണക്റ്റിവിറ്റിയിലും ആഗോളതലത്തിൽ ശക്തമായ സാന്നിധ്യമായി ഖത്തർ

ഗ്ലോബൽ ഏവിയേഷൻ ഇൻഡസ്ട്രിയിൽ ഖത്തർ ശക്തമായ സാന്നിധ്യം അറിയിച്ചു കൊണ്ടിരിക്കുന്നു. ഖത്തറിന്റെ മുൻനിര എയർലൈനായ ഖത്തർ എയർവേയ്‌സ്, ഹമദ് ഇൻ്റർനാഷണൽ എയർപോർട്ട് (എച്ച്ഐഎ) എന്നിവയുടെ കുറ്റമറ്റ പ്രവർത്തനങ്ങൾ ഇക്കാര്യത്തിൽ നിർണായക പങ്കു വഹിക്കുന്നു. ലോകമെമ്പാടുമുള്ള സഞ്ചാരികൾക്ക് ഒരു പ്രധാന കണക്ഷൻ പോയിൻ്റായി ഖത്തർ മാറിയിട്ടുണ്ട്.

ഖത്തർ സിവിൽ ഏവിയേഷൻ അതോറിറ്റിയുടെ (ക്യുസിഎഎ) ഉപദേഷ്ടാവായ മുസ്‌തഫ ഫഖ്രി, ഹമദ് എയർപോർട്ട് വഴിയുള്ള യാത്രക്കാരുടെയും എയർ കാർഗോയുടെയും വളർച്ച ഖത്തറിൻ്റെ സമ്പദ്‌വ്യവസ്ഥയെ എങ്ങനെ സഹായിക്കുകയും വിനോദസഞ്ചാരം ഉയർത്തുകയും ചെയ്യുന്നുവെന്ന് അടുത്തിടെ എടുത്തുകാണിച്ചു. കഴിഞ്ഞ ദശകത്തിൽ വ്യോമയാന മേഖലയിലെ കാര്യക്ഷമതയുടെ മാതൃകയായി HIA മാറിയെന്ന് അദ്ദേഹം ചൂണ്ടിക്കാട്ടി.

മിഡിൽ ഈസ്റ്റിൻ്റെ ഹൃദയഭാഗത്ത് സ്ഥിതി ചെയ്യുന്ന, ഖത്തർ എയർവേയ്‌സും എച്ച്ഐഎയും കിഴക്കും പടിഞ്ഞാറുമുള്ള പ്രധാന നഗരങ്ങളെ ബന്ധിപ്പിക്കുന്നു. 2014ൽ HIA തുറന്നതിനുശേഷം, യാത്രക്കാരുടെ എണ്ണം തുടർച്ചയായി വർദ്ധിച്ചുകൊണ്ടിരിക്കുകയാണ്. വിമാനത്താവളത്തിൻ്റെ മികച്ച സേവനങ്ങളും ആധുനിക സൗകര്യങ്ങളും ലോകമെമ്പാടുമുള്ള യാത്രക്കാരെ ആകർഷിച്ചിട്ടുണ്ടെന്ന് ഫഖ്രി പറഞ്ഞു.

ഖത്തറിലേക്ക് ഏറ്റവും കൂടുതൽ പ്രതിവാര വിമാന സർവീസുകൾ ഉള്ളത് ഇന്ത്യയിൽ നിന്നാണ്, യുഎസും യുകെയും തൊട്ടുപിന്നിലുണ്ട്. യുഎഇയിലേക്കും സൗദി അറേബ്യയിലേക്കുമാണ് ഖത്തറിൽ നിന്ന് പ്രതിവാരം ഏറ്റവും കൂടുതൽ വിമാനങ്ങൾ സർവീസ് നടത്തുന്നത്. ഈ സമ്മറിൽ, ലണ്ടൻ, ദുബായ്, ബാങ്കോക്ക്, ഇസ്‌താംബുൾ എന്നിവയാണ് ദോഹയിൽ നിന്നുള്ള ജനപ്രിയ ലക്ഷ്യസ്ഥാനങ്ങൾ.

കഴിഞ്ഞ വർഷം, HIA ഏകദേശം 46 ദശലക്ഷം യാത്രക്കാരെ സ്വാഗതം ചെയ്‌തു. ഇത് മുൻ വർഷത്തെ അപേക്ഷിച്ച് 28.5% വർദ്ധനവ് രേഖപ്പെടുത്തി. ഉപഭോക്താക്കളുടെ സംതൃപ്‌തിയിലും ഫ്ലൈറ്റ് റൂട്ടുകൾ വിപുലീകരിക്കുന്നതിലും എയർപോർട്ട് ശ്രദ്ധ കേന്ദ്രീകരിക്കുന്നത് യാത്രക്കാർക്കിടയിൽ അതിനെ കൂടുതൽ ജനപ്രിയമാക്കിയെന്ന് ഫഖ്രി ഊന്നിപ്പറഞ്ഞു. ഈ വളർച്ച വ്യോമയാന മേഖലയെ ഉത്തേജിപ്പിക്കുക മാത്രമല്ല, തൊഴിലവസരങ്ങൾ സൃഷ്‌ടിക്കുകയും ബിസിനസ്സ് വികസനത്തെ പിന്തുണയ്ക്കുകയും ചെയ്യുക വഴി ഖത്തറിൻ്റെ സമ്പദ്‌വ്യവസ്ഥയെ സഹായിക്കുന്നു.

ഖത്തർ എയർവേയ്‌സും എച്ച്ഐഎയും രാജ്യത്തെ ബിസിനസ്സിനും വിനോദസഞ്ചാരത്തിനുമുള്ള മികച്ച ലക്ഷ്യസ്ഥാനമാക്കി മാറ്റിയതെങ്ങനെയെന്ന് അദ്ദേഹം പറഞ്ഞു. യാത്രാ സൗകര്യം ബഹുരാഷ്ട്ര കമ്പനികളെയും അന്താരാഷ്ട്ര പരിപാടികളെയും ഖത്തറിലേക്ക് ആകർഷിച്ചു, ഇത് സന്ദർശകരുടെ എണ്ണത്തിൽ ഗണ്യമായ വർദ്ധനവിന് കാരണമായി. സംസ്കാരവും വിനോദസഞ്ചാരവും പ്രോത്സാഹിപ്പിക്കുന്നതിനുള്ള രാജ്യത്തിൻ്റെ പ്രതിബദ്ധത ലോകമെമ്പാടുമുള്ള വിനോദസഞ്ചാരികൾ സ്ഥിരമായി വരുന്നതിലേക്ക് നയിച്ചുവെന്നും ഫഖ്രി കൂട്ടിച്ചേർത്തു.