നാഷണൽ സ്പോർട്ട്സ് ഡേ ദിവസം മികച്ച പ്രവർത്തനങ്ങളുമായി പിഎച്ച്സിസി ഹെൽത്ത് സെന്ററുകൾ, നാലായിരത്തിലധികം പേർക്ക് സേവനം നൽകി

ദേശീയ കായിക ദിനത്തിൽ (ഫെബ്രുവരി 11, 2025, ചൊവ്വാഴ്ച്ച) തങ്ങളുടെ 20 ആരോഗ്യ കേന്ദ്രങ്ങളിൽ പൗരന്മാരും താമസക്കാരും ഉൾപ്പെടെ മൊത്തം 4,465 സന്ദർശകരെ സ്വീകരിച്ചതായി പ്രൈമറി ഹെൽത്ത് കെയർ കോർപ്പറേഷൻ (PHCC) അറിയിച്ചു.

ഇവരിൽ 3,324 പേർ ജനറൽ മെഡിസിൻ, ഫാമിലി മെഡിസിൻ ക്ലിനിക്കുകൾ സന്ദർശിച്ചപ്പോൾ 142 പേർ ജനറൽ ഡെൻ്റിസ്ട്രി ക്ലിനിക്കുകളിലാണ് പോയത്.

അൽ മഷാഫ്, അൽ സദ്ദ്, അബൂബക്കർ അൽ സിദ്ദിഖ്, അൽ റുവൈസ്, അൽ ഷിഹാനിയ, അൽ കഅബാൻ, ഗരാഫത്ത് അൽ റയ്യാൻ, റൗദത്ത് അൽ ഖൈൽ, മുഐതർ, ഉമ്മുസ്ലാൽ, ലീബൈബ്, അൽ കരാന എന്നീ 12 ആരോഗ്യ കേന്ദ്രങ്ങളിലെ അടിയന്തര പരിചരണ വിഭാഗങ്ങൾ 504 പേർക്കാണ് ചികിത്സ നൽകിയത്.

നേത്രചികിത്സ (കണ്ണ് സംരക്ഷണം), ഇഎൻടി (ചെവി, മൂക്ക്, തൊണ്ട), ഡെർമറ്റോളജി (ചർമ്മ സംരക്ഷണം), വിവാഹത്തിനു മുമ്പുള്ള സ്ക്രീനിംഗ് എന്നിവ ഉൾപ്പെടെയുള്ള പ്രത്യേക ക്ലിനിക്കുകളും ലഭ്യമാണ്. ലീബൈബ്, റൗദത്ത് അൽ ഖൈൽ ആരോഗ്യ കേന്ദ്രങ്ങളിലെ ഒഫ്താൽമോളജി ക്ലിനിക്കിൽ 52 രോഗികളും ഇഎൻടി ക്ലിനിക്കിൽ 39 രോഗികളും ഡെർമറ്റോളജി ക്ലിനിക്കിൽ 45 രോഗികളും എത്തി. ലീബൈബ്, അൽ മഷാഫ് ഹെൽത്ത് സെൻ്ററുകളിലെ വിവാഹത്തിനു മുമ്പുള്ള സ്‌ക്രീനിംഗ് ക്ലിനിക്കിൽ 10 സന്ദർശകരെത്തി.

രോഗികളുടെ ആവശ്യങ്ങൾ നിറവേറ്റുന്നതിനായി ഫാർമസി, റേഡിയോളജി (എക്‌സ്-റേ), ലബോറട്ടറി പരിശോധനകൾ തുടങ്ങിയ മറ്റ് സേവനങ്ങളും ലഭ്യമായിരുന്നു.

കൂടാതെ, PHCC-യുടെ കമ്മ്യൂണിറ്റി കോൾ സെൻ്റർ 16000 ഹെൽപ്പ്‌ലൈനിലൂടെ 169 വെർച്വൽ കൺസൾട്ടേഷനുകൾ (വീഡിയോയും വോയ്‌സും) നൽകി. അടിയന്തിര വൈദ്യോപദേശങ്ങളും കുറിപ്പടികളും വേഗത്തിൽ ലഭിക്കാൻ ഈ സേവനം ആളുകളെ സഹായിക്കുന്നു.

ഡ്യൂട്ടിയിലുള്ള എല്ലാ ആരോഗ്യ കേന്ദ്രങ്ങളും കാര്യക്ഷമമായി പ്രവർത്തിച്ചതായി PHCC സ്ഥിരീകരിച്ചു, കൂടുതൽ കാത്തിരിപ്പും കാലതാമസവും ഇല്ലെന്ന് അവർ ഉറപ്പാക്കി. ഖത്തറിൻ്റെ ദേശീയ ആരോഗ്യ തന്ത്രവും വിഷൻ 2030-യുമായി യോജിപ്പിച്ച് രോഗി പരിചരണത്തിനാണ് മുൻഗണന നൽകുന്നതെന്ന് അവർ പറഞ്ഞു.

ഖത്തറിലെ വാർത്തകളും വിവരങ്ങളും തത്സമയം ലഭിക്കാൻ -വാട്ട്സ്ആപ്പ് ഗ്രൂപ്പ് 👇https://chat.whatsapp.com/KIN30zTLtBDKISiedAzBHx