ഹമദ് ആശുപത്രികൾ സന്ദർശിക്കുന്നവർ ഇക്കാര്യം ശ്രദ്ധിക്കുക; കർശന നിയന്ത്രണങ്ങൾ

ഖത്തറിൽ കോവിഡ് രോഗബാധ കുതിച്ചുയർന്നതോടെ, രോഗികളെ സന്ദർശിക്കുന്നവർക്ക് കനത്ത നിയന്ത്രണങ്ങൾ പ്രഖ്യാപിച്ച് ഹമദ് മെഡിക്കൽ കോർപറേഷൻ. കോവിഡിന് മാത്രമായി സജ്ജീകരിച്ചിട്ടുള്ള ഹമദിന്റെ 3 സ്‌പെഷ്യൽ സെന്ററുകളായ ഹസം മൊബിരീക്ക് ഫീൽഡ് ഹോസ്പിറ്റൽ, കമ്യൂണികബിൾ സെന്റർ, ദി ക്യൂബൻ ഹോസ്പിറ്റൽ എന്നിവിടങ്ങളിൽ സന്ദർശകർക്ക് പ്രവേശനമില്ല. 

മറ്റു സാധാരണ ഹോസ്പിറ്റലുകളിൽ വിസിറ്റേഴ്‌സ് സമയം വൈകിട്ട് 3 മുതൽ രാത്രി 8 വരെയായി പരിമിതപ്പെടുത്തി. സന്ദർശകർക്ക് ഇഹ്തിറാസിൽ ഗ്രീൻ സ്റ്റാറ്റസ് ഉണ്ടാവണം. മാസ്‌ക് ധരിക്കണം. പ്രവേശനത്തിന് മുൻപ് താപപരിശോധനക്ക് വിധേയമാകണം. 

ഒരു സമയം ഒരു സന്ദർശകൻ മാത്രം, അതും പരമാവധി 15 മിനിറ്റ്. ഒരു ദിവസം പരമാവധി 3 സന്ദർശകർ. സന്ദർശകരോടൊപ്പം ആരെയും അനുഗമിക്കാൻ അനുവദിക്കില്ല. 

ഭക്ഷണം, മധുരം, ഫ്ളവേഴ്‌സ് തുടങ്ങിയവ ആശുപത്രിക്കുള്ളിലേക്ക് അനുവദിക്കില്ല. 15 വയസ്സിന് താഴെയുള്ള കുട്ടികൾക്ക് സന്ദർശനം പൂർണമായും നിരോധിച്ചു.