2022 ഫിഫ ലോകകപ്പിന്റെ വിജയം ഉറപ്പാക്കുന്നതിനായി ഖത്തറിലെ വിവിധ എംബസികളോടും പ്രവാസി കമ്മ്യൂണിറ്റി നേതാക്കളോടും 2022-ലെ ഫിഫ ലോകകപ്പ് വോളന്റിയറായി ചേരാൻ അതാത് രാജ്യത്ത് നിന്നുള്ള പ്രവാസികളെ പ്രോത്സാഹിപ്പിക്കണമെന്ന് തൊഴിൽ മന്ത്രാലയത്തിലെ തൊഴിൽ അണ്ടർസെക്രട്ടറി മുഹമ്മദ് ഹസൻ അൽ ഒബൈദ്‌ലി അഭ്യർഥിച്ചു.
അറബ് മേഖലയിലെ തൊഴിൽ കയറ്റുമതി രാജ്യങ്ങളിലെ എംബസി പ്രതിനിധികളുമായും കമ്മ്യൂണിറ്റി നേതാക്കളുമായും ഞായറാഴ്ച നടത്തിയ സംവേദനാത്മക യോഗത്തിലാണ് ഒബൈദ്‌ലി ഇക്കാര്യം ആവശ്യപ്പെട്ടത്.
ടൂർണമെന്റിന്റെ ഉജ്ജ്വല വിജയം ഉറപ്പാക്കുക എന്നത് ഖത്തറിലെ എല്ലാവരുടെയും, ഖത്തറികളുടെയും പ്രവാസികളുടെയും കൂട്ടുത്തരവാദിത്വമാണെന്ന് അദ്ദേഹം പറഞ്ഞു.
“2022 ഖത്തറിൽ നടക്കുന്ന ഫിഫ ലോകകപ്പിന് ടൂർണമെന്റിന്റെ സുഗമവും അവിസ്മരണീയവുമായ നടത്തിപ്പ് ഉറപ്പാക്കാൻ നിരവധി മേഖലകളിൽ ധാരാളം സന്നദ്ധപ്രവർത്തകർ ആവശ്യമാണ്. മെഗാ ഇവന്റ് സംഘടിപ്പിക്കുമ്പോൾ ഉണ്ടാകാവുന്ന വെല്ലുവിളികളെ നേരിടാൻ ഞങ്ങൾ ഒരുമിച്ച് പ്രവർത്തിക്കുകയും ഏകോപിപ്പിക്കുകയും ചെയ്യേണ്ടതുണ്ട്,” അദ്ദേഹം പറഞ്ഞു.
വോളണ്ടിയർ റിക്രൂട്ട്‌മെന്റ് പ്രക്രിയ ലഘൂകരിക്കുന്നതിനും കഴിയുന്നത്ര ആളുകളെ പങ്കെടുക്കാൻ അനുവദിക്കുന്നതിനുമായി, നിലവിലെ തൊഴിലുടമകളുമായുള്ള കരാർ കാലഹരണപ്പെട്ടതിന് ശേഷവും രാജ്യത്ത് തുടരാൻ സന്നദ്ധതയുള്ള തൊഴിലാളികളെ പ്രാപ്‌തമാക്കുന്നതിന് മന്ത്രാലയം പ്രത്യേക സംവിധാനം ആവിഷ്കരിക്കുമെന്നു ഒബൈഡ്‌ലി പറഞ്ഞു.
ഇവർക്ക് നിയമപരമായ റസിഡന്റ് പദവി ലഭിക്കുന്നതിന് മറ്റൊരു കമ്പനിയിലേക്ക് ട്രാൻസ്ഫർ ചെയ്യാനുള്ള നടപടികൾ എളുപ്പമാക്കും.
വളണ്ടീയറിംഗിൽ പ്രവർത്തിക്കാൻ എംബസികൾ, പ്രവാസി കമ്മ്യൂണിറ്റികൾ, മറ്റ് സ്ഥാപനങ്ങൾ എന്നിവയുമായി മന്ത്രാലയം ഒരു ഏകോപന ഗ്രൂപ്പിന് രൂപം നൽകുമെന്നും എല്ലാ സന്നദ്ധപ്രവർത്തകർക്കും ആവശ്യമായ പ്രോത്സാഹനങ്ങളും മറ്റ് പിന്തുണകളും നൽകുമെന്നും അദ്ദേഹം കൂട്ടിച്ചേർത്തു.
