സേവനങ്ങൾ വിപുലീകരിച്ച് ഐഷ ബിൻത് ഹമദ് അൽ അത്തിയാ ഹോസ്‌പിറ്റൽ

ഹമദ് മെഡിക്കൽ കോർപ്പറേഷൻ്റെ (എച്ച്എംസി) ഭാഗമായ ഐഷ ബിൻത് ഹമദ് അൽ അത്തിയാ ഹോസ്‌പിറ്റൽ 2022-ൽ തുറന്നതുമുതൽ അതിൻ്റെ സേവനങ്ങൾ വിപുലീകരിക്കുകയും രോഗികളുടെ എണ്ണത്തിൽ വർധനവ് രേഖപ്പെടുത്തുകയും ചെയ്തു. എച്ച്എംസിയുടെ ഏറ്റവും വലിയ രണ്ടാമത്തെ ആശുപത്രിയെന്ന നിലയിൽ, ഹമദ് ജനറൽ ആശുപത്രിയുടെ നവീകരണ പ്രവർത്തനങ്ങൾ ആരംഭിക്കുമ്പോൾ സേവനങ്ങൾ ഇവിടേക്കാണ്‌ മാറ്റുന്നത്.

കഴിഞ്ഞ ദിവസം നൽകിയ അഭിമുഖത്തിൽ മെഡിക്കൽ ഡയറക്ടറും ആക്ടിംഗ് സിഇഒയുമായ ഡോ. ഇബ്രാഹിം ഫൗസി, ആശുപത്രിയുടെ വളർച്ച എടുത്തുപറഞ്ഞു. ഫിഫ ലോകകപ്പിനിടെ തുറന്ന ഹോസ്‌പിറ്റലിന്റെ ശേഷി അതിനു ശേഷം ഗണ്യമായി വർധിപ്പിച്ചതായി അദ്ദേഹം അഭിപ്രായപ്പെട്ടു. 400 കിടക്കകളുള്ള ആശുപത്രിയിൽ വിപുലമായ സൗകര്യങ്ങളും സ്‌പെഷ്യൽ മെഡിക്കൽ കെയറും ലഭ്യമാണ്. അൽ ഖോറിനും ലുസൈലിനും ഇടയിലുള്ള ടെൻബെക്ക് മേഖലയിലാണ് ഇത് സ്ഥിതി ചെയ്യുന്നത്.

അൽ ഖോർ, ഉം സലാൽ, അൽ ദയീൻ, ലുസൈൽ, ദി പേൾ എന്നിവയുൾപ്പെടെ വടക്കൻ ഖത്തറിൽ നിന്നുള്ള രോഗികൾക്ക് സേവനം നൽകുന്നതിന് അൽ ഖോർ ആശുപത്രിയുമായി ചേർന്ന് ഐഷ ബിൻത് ഹമദ് അൽ അത്തിയാ ഹോസ്‌പിറ്റൽ പ്രവർത്തിക്കുന്നുണ്ടെന്ന് ഡോ. ഫൗസി വിശദീകരിച്ചു. അൽ വക്ര, ഓൾഡ് എയർപോർട്ട് ഏരിയ എന്നിവിടങ്ങളിൽ നിന്നുള്ള രോഗികളെയും ഇത് സ്വീകരിക്കുന്നു.

ജനറൽ, ലാപ്രോസ്‌കോപ്പിക് സർജറി, റോബോട്ടിക് സർജറി, ബാരിയാട്രിക് സർജറി, ഗൈനക്കോളജി, യൂറോളജി, മാക്‌സിലോഫേഷ്യൽ സർജറി, ഓർത്തോപീഡിക്‌സ് തുടങ്ങി വിവിധ മെഡിക്കൽ മേഖലകളിൽ ഐഷ ബിൻത് ഹമദ് അൽ അത്തിയാ ഹോസ്പിറ്റൽ സേവനങ്ങൾ വാഗ്ദാനം ചെയ്യുന്നു. സെപ്തംബറിൽ, ആശുപത്രിയിൽ ഒബ്സ്റ്റട്രിക്സ് ആൻഡ് ഗൈനക്കോളജി സേവനങ്ങൾ ആരംഭിച്ചിരുന്നു. പൂർണ്ണമായും പ്രവർത്തനക്ഷമമായ അത്യാഹിത വിഭാഗവും തീവ്രപരിചരണ വിഭാഗവും നിയോനാറ്റൽ ഇൻ്റൻസീവ് കെയർ യൂണിറ്റും (NICU) ഇവിടെയുണ്ട്.

24 മണിക്കൂറും ഉയർന്ന ഗുണമേന്മയുള്ള എമർജൻസി സേവനങ്ങൾ നൽകുന്ന ആശുപത്രി ദിനംപ്രതി 200 ഓളം രോഗികളെ ചികിത്സിക്കുന്നുണ്ടെന്ന് എമർജൻസി മെഡിസിൻ സീനിയർ കൺസൾട്ടൻ്റും എമർജൻസി ഡിപ്പാർട്ട്‌മെൻ്റ് ആക്ടിംഗ് ഹെഡുമായ ഡോ. റാണ അൽ സെയ്ദ് റിപ്പോർട്ട് ചെയ്തു. രോഗികളെ അവരുടെ അവസ്ഥയെ അടിസ്ഥാനമാക്കി നിരീക്ഷിക്കുകയും ചികിത്സിക്കുകയും ചെയ്യുന്നു.

ആശുപത്രി തുറന്നതിനുശേഷം റേഡിയോളജി വിഭാഗം 26,000-ത്തിലധികം മെഡിക്കൽ പരിശോധനകൾ നടത്തി, മറ്റ് ആശുപത്രികളിലെ ജോലിഭാരം കുറയ്ക്കാൻ സഹായിച്ചു. എല്ലാ പ്രായത്തിലുമുള്ള രോഗികൾക്ക് മുഴുവൻ സമയവും സമഗ്രമായ രോഗനിർണ്ണയ, ചികിത്സാ സേവനങ്ങൾ വകുപ്പ് വാഗ്ദാനം ചെയ്യുന്നുണ്ടെന്ന് സീനിയർ കൺസൾട്ടൻ്റ് റേഡിയോളജിസ്റ്റ് ഡോ. റെനാൻ എൽസാഡെഗ് ഇബ്രാഹം പറഞ്ഞു.